हङकङ, २७ माघ । १०८ औं अन्तराष्ट्रिय महिला दिवसको अवसरमा हङकङ नेपाली महिला संघले महिलाहरुलाई सम्मान सहित विशेष कार्यक्रम गर्ने भएको छ ।
एनआरएन हङकङको कार्यालयमा हालै एक पत्रकार सम्मेलन आयोजना गरी हङकङ नेपाली महिला संघले यसको जानकारी दिएको हो ।
१०८ औं अन्तराष्ट्रिय महिला दिवस ‘प्रगतिको लागि दबाव’ को नारा सहित ४ मार्च २०१८ को दिन दिउसो ३ बजे बाट याउ मा ताई कम्यूनिटी हलमा आयोजना गरिनेछ ।
नेपाली महिला संघकी अध्यक्ष टिका गुरुङका अनुसार कार्यक्रमलाई भव्यतापूर्वक सम्पन्न गर्नको लागि एनआरएन हङकङ महिला विभाग, नमोबुद्ध आमा समूह, तमु ट्हो हृयुल, मगर संघ, संखुवासभा समाज, म्याग्दी नेपाली प्रवास संघ र चाम्लिङ किरात राई खाम्बातिम महिला विभागको सक्रिय सहभागिता रहनेछ ।
विगतमा जस्तै यसबर्ष पनि हङकङको नेपाली समुदायबाट बर्ष महिला चयन सहित विविध विधा सक्रिय महिलाहरुलाई सम्मान गर्ने कार्यक्रम रहेको छ ।
कार्यक्रमको प्रमुख वक्ताको लागि नेपालबाट पौरखी नेपालका संस्थापक अध्यक्ष मञ्जु गुरुङलाई आमन्त्रण गरिएको छ । उनलाई सम्मान गर्ने कार्यक्रम पनि रहेको छ ।
कार्यक्रमलाई नेपाल वायुसेवा निगमले विशेष सहयोेग गर्ने भएको छ ।
