वाशिंटन डी.सी.(संयुक्त राज्य अमेरिका), १३ असोज(बीबीसी) । गत अगस्ट महिनामा अमेरिका अफगानिस्तानबाट पूर्ण रूपमा फर्कनुअघि आफूहरूले २ हजार ५ सय जनाको एउटा सैन्य टोलीलाई त्यही कायम राख्नुपर्ने सुझाव दिएको अमेरिकाका दुई जना शीर्ष सैन्य जनरलहरूले बताउनुभएको छ।

जनरल मार्क मिली र जनरल फ्रयाङ्क मखेन्जीले कङ्ग्रेसमा दिएको गवाही राष्ट्रपति जो बाइडनको भनाइसँग बाझिएकोजस्तो देखिएको छ।

राष्ट्रपति बाइडनले त्यस्तो सुझाव दिइएको स्मरण आफूसँग नरहेको जनाउनुभएको थियो।

तीव्र गतिमा अघि बढ्दै गत अगस्ट महिनामा तालिबानले अफगानिस्तानको सत्ता आफ्नो नियन्त्रणमा लिएको थियो।

अफगान सरकार छिट्टै ढलेको विषयले अमेरिकालाई आश्चर्यचकित पारेको जनरल मिलीले बताउनुभयो।

रक्षामन्त्री सहित दुईजना शीर्ष जनरलहरूलाई माथिल्लो सदन सिनेटको आर्मड सर्भीसेस कमिटीले मङ्गलवार सोधपुछ गरेको थियो।

सुझाव

अफगानिस्तानबाट अमेरिकाको फिर्ता हुने विषय निरीक्षण गरेका जनरल मखेन्जीले रिपब्लिकन सिनेटरहरूको प्रश्नको जवाफ दिने क्रममा आफूले २ हजार ५ सय सेनाको सानो टुकडी अफगानिस्तानमा राख्न सुझाव दिएको बताउनुभएको थियो।

अगस्ट १९ मा एकजना पत्रकारलाई जवाफ दिने क्रममा बाइडनले आफूलाई त्यस्तो सुझाव दिइएको स्मरण नरहेको बताउनुभएको थियो।

जनरल मिलीले त्यस्तो सुझावमा आफू सहमत भएको बताउनुभयो। तर उहाँलाई एकजना रिपब्लिकन सिनेटरले बाइडनको प्रतिक्रिया के ‘गलत बयान’ हो भनेर प्रश्न गर्दा भने उहाँले त्यसको सोझो उत्तर दिन मान्नुभएन।

ह्वाइटहाउसकी प्रवक्ता जेन साकीले पछि उक्त विषयलाई सम्बोधन गर्नुभएको थियो।

उहाँले भन्नुभयो, ‘राष्ट्रपतिले सेना लगायतको सल्लाहलाई महत्त्व दिन्छन्। तर त्यसको अर्थ यो होइन की उनले सधैँ त्योसँग सहमत हुन्छन्।’