काठमाडौं, १६ फागुन । नेपालको शेयर बजार मंगलबार ओरालो लागेको छ । यस दिन धितोपत्र बजार परिसूचक ३.८१ अङ्कले ओरालो लागेर २०१९.९३ बिन्दुमा रोकिएको छ ।

यस दिन २ सय ६२ कम्पनीका ३९ लाख ४६ हजार २४ कित्ता शेयरको किनबेचबाट १ अर्ब ३८ करोड ७८ लाख ६५ हजार ५ सय १५ रुपैया ७५ पैसाको कारोबार भएको छ ।

यस दिन नेपाल स्टक एक्सचेञ्जले बर्गीकृत गरी कारोबारमा आएका १३ उपसमूहको शेयरमध्ये चार उपसमूहको उपपरिसूचक उकालो लाग्दा नौ उपसमूहको उपपरिसूचक गिरावट आएको छ ।

कारोबार भएकामध्ये ८८ कम्पनीको शेयर मूल्यमा वृद्धि हुँदा एक सय १८ कम्पनीको भने ओरालो लागेको छ । यस्तै, १० उपसमूहको शेयर मूल्यमा भने कुनै परिवर्तन भएको छैन ।

नेप्सेका अनुसार आँधीखोला लघुवित्त, आदर्श लघुवित्त र खप्तड लघुवित्तको शेयर मूल्यमा १० प्रतिशतले वृद्धि भई सकारात्मक सर्किट लागेको छ । यस्तै, सिद्धार्थ इन्स्योरेन्स छ दशमलव १४, सपोर्ट माइक्रोफाइनान्सका लगानीकर्ताले पाँच दशमलव ७६ प्रतिशतले कमाएका छन् ।

त्यस्तै, प्रिमियर इन्स्योरेन्स तीन दशमलव ८५, राप्ती हाइड्रो तीन दशमलव ८४, सामलिङ पावर तीन दशमलव ७९, तारागाँउ रिजेन्सी होटल तीन दशमलव ७८, स्वाभिमान लघुवित्तका लगानीकर्ताले तीन दशमलव २९ प्रतिशतले गुमाएका छन् ।

कारोबारका आधारमा युनिभर्सल पावर शीर्ष स्थानमा रहेको छ । सो कम्पनीको रु सात करोड ५५ लाख ११ हजार पाँच सय ८४ बराबरको कारोबार भयो ।

यस्तै, शिवम् सिमेन्ट रु छ करोड ५० लाख ६९ हजार नौ सय ८९, सानिमा माई हाइड्रोपावर रु छ करोड ४६ लाख १३ हजार नौ सय ७७, नेपाल पूर्वाधार बैङ्क रु तीन करोड ७६ लाख २४ हजार पाँच सय ७६ र हिमालयन डिस्टिलरी रु तीन करोड ४४ लाख ६० हजार आठ सय १९ बराबरको कारोबार भई शीर्ष पाँचभित्र पर्न सफल भएका छन् ।