टोकियो(जापान),२० बैशाख । नेवा अन्तराष्र्टिय फोरम जापानको आयोजनामा जापानमा रहेका नेवार परिवारका कन्याहरुको सामूहिक बेल बिबाह कार्यक्रम सम्पन्न भएको छ ।
टोकियोको कोटोकु कितासुनास्थित दान्ची हलमा आयोजना गरिएको बेल विबाह कार्यक्रममा नौ जना कन्याहरुको सहभागिता रहेको थियो ।
विश्वको विकसित देशको अत्याधुनिक शहरमा समेत नेपाली मौलिक नेवारी परम्परा अनुरुप रीतपूर्वक आफ्ना नानीहरुको बेलबिबाह कार्यक्रम गर्न पाएकोमा अभिभावकहरु अत्यन्त हर्षित देखिन्थे ।
कार्यक्रममा नेपाली सहित जापानी पाहुनाहरुको भव्य उपस्थिति रहेको थियो ।
बेल बिबाहपछि राजधानी उपत्यकाको नेवारी परम्परालाई संझाउने गरी झों भ्वोय अर्थात लप्ते भोजको समेत आयोजना गरिएको थियो ।
अभिभावक र आगन्तुक पाहुनाहरुले सामुहिक बेल बिबाह कार्यक्रममा सरिक कन्याहरु युना श्रेष्ठ, गाभास्ति तुलाधर, आसना पालिखे,अदिती श्रेष्ठ,तोमोमी साथी श्रेष्ठ, आईरी शाक्य, आकी राजभण्डारी,आएरा कर्माचार्य,सारना महर्जनलाई शुभार्शिवाद दिएका थिए ।
