काठमाडौं, १३ वैशाख । नेपाल शिक्षक महासंघ र सरकारबीच आज शनिबार बिहान भएको वार्ता निष्कर्ष विहीन भएको छ । वार्ता सिंहदरबारस्थित शिक्षा, विज्ञान तथा प्रविधि मन्त्रालयमा मन्त्री रघुजी पन्तको उपस्थितिमा भएको थियो ।
आजको वार्तामा आन्दोलनरत शिक्षक महासंघले आफ्नो मागबारे मन्त्री रघुजी पन्तलाई राखेका थिए । मन्त्रालयबाट भने शिक्षकका माग सम्बोधनबारे ठोस कुरा आइनसकेको पाइएको छ । तर, वार्तालाई निरन्तरता दिने सहमति भएको पाइएको छ ।
शिक्षकहरू आन्दोलित भएको आज ८५ औं दिन भएको छ । शैक्षिक हड्ताल गरेर काठमाडौं केन्द्रित सडक आन्दोलन गरेको २५ दिन पुगेको छ ।
लामो समय सार्वजनिक शिक्षा प्रभावित भएपछि सरकारले माग सम्बोधनका लागि केही तदारुकता देखाए पनि दुवै पक्षमा आवश्यक लचकताको अभावमा सहमति हुन सकेको छैन ।
