ढाका(बंगलादेश), ३१ आषाढ ।साफ यु-२० महिला च्याम्पियनसिपमा आज नेपालले श्रीलंकालाई ७-० को फराकिलो अन्तरमा हराएको छ।
दक्षिण एशियाका चार राष्ट्र सम्मिलित यो प्रतियोगितामा नेपालले खेलेका तीन खेलमा यो दोस्रो जित हो। तीन खेलबाट नेपालले ६ अंक बनाएको छ।
खेल बंलादेशको बसुन्धरा किङ्स एरिनामा भइरहेको छ । आजको खेल वर्षाको कारण नियमित समय भन्दा ढिला गरी सुरु भयो।
आज नेपालले श्रीलंका विरूद्ध गोलको वर्षा गर्यो।खेलमा मिना साउदले ह्याट्रिक गर्दा पुर्णिमा राईले २ तथा समिक्षा मगर र सरिताकुमारी नाथले समान १ । १ गोल गरे । ।
आजको खेलमा पहिलो हाफमा नेपालले उत्कृष्ट खेल्यो । खेल सुरु भएको आठौं मिनेटमा मिनाले गोलको खाता खोलिन्।उनले बक्स बाहिरबाट हानेको प्रहार गोलमा परिणत भयो। १३ औं मिनेटमा समिक्षाले अग्रता दुगुना गरिन्। श्रीलंकन खेलाडीले क्लियर गर्न नसकेको बललाई समिक्षाले बक्स बाहिरबाट प्रहार गर्दै गोलमा परिणत गरिन।
खेलको ४२ औं मिनेटमा नेपालले तेस्रो गोल गर्यो। माया मास्केको लङग रेन्ज प्रहारलाई श्रीलंकाकी गोल किपर थारुसिका डि डोडामगोडागीले बचाएपनि रिबाउन्डमा मिनाले सेकेन्ड बारमा हानेको प्रहार पोलमा लाग्दै गोल भयो।
पहिलो हाफको इन्ज्युरी टाइममा पूर्णिमा राईले दुई गोल गरिन्। थप गरिएको ४ मिनेटको दोस्रो मिनेटमा काउन्टर एटयाकमा बक्स बाहिरबाट हानेको प्रहारले सही दिशा लियो। यसपछि इन्ज्युरी समयको चौथौ मिनेटमा पूर्णिमाले किपरसँगको वान भर्सेज वानमा हानेको प्रहार किपरको हातको स्पर्स लिंदै गोलमा परिणत भयो। पहिलो हाफमा नेपालले ५-० को अग्रता बनायो।
दोस्रो हाफमा भने श्रीलंका विरूद्ध नेपालले दुई गोल मात्र गर्न सक्यो। ७० औं मिनेटमा वर्षा ओलीको पास श्रीलंकाको डिफेन्डरलाई लागेर आएको बललाई मिनाले सही दिशा दिईन्। योसँगै मिनाले ह्याट्रिकको सफलता प्राप्त गरिन्।
यसपछि इन्जुरी समयको पहिलो मिनेटमा करिब २५ यार्ड टाढाबाट सरिताले हानेको फ्रि-किक श्रीलंकाकी गोलकिपरको हातमा लाग्दै गोल पोष्टको जाली भित्रबाट चुम्न सफल रह्यो । यो सँगै नेपालले ७-० को जित हात पार्यो।
पहिलो खेलमा भुटानलाई ६-१ ले हराएको नेपाल दोस्रो खेलमा आयोजक बंलादेशसँग ३-२ होल अन्तरले हारेको थियो। अब नेपालले बिहिवार श्रीलंकासँग नै खेल्नेछ।
४ टोलीले एकअर्कासँग २ पटक खेलेपछि शीर्ष टोली च्याम्पियन बन्नेछ।
