लण्डन(संयुक्त अधिराज्य), २९ फागुन (बीबीसी) । संयुक्त राज्य अमेरिकाले इरानविरुद्ध आफू र इजरायलले गरेको युद्धको आर्थिक प्रभाव कम पार्ने उद्देश्यले अरू देशलाई रुसमा उत्पादित तेल र पेट्रोलियम पदार्थ किन्ने अनुमति दिने निर्णय गरेको छ।

अमेरिकी अर्थमन्त्री स्कट बेसन्टका अनुसार युद्धका बेला विश्वको ऊर्जाबजारमा स्थिरता कायम राख्न अस्थायी उपायस्वरूप उक्त निर्णय लिइएको हो।

अमेरिकाले रुसी तेल किन्न नपाउने प्रतिबन्ध एप्रिल ११ सम्मका लागि फुकुवा गरेको हो। तर देशहरूले समुद्रमा रहेका पानीजहाजमा भरिएको तेल मात्र किन्न पाउने छन्।

“यो तत्कालीन उपाय ट्रान्जिटमा भएको तेलका लागि मात्र हो र यसबाट रुस सरकारलाई खासै आर्थिक लाभ पुग्दैन”,बेसन्टले भन्नुभएको छ।

रुसले अहिले झन्डै १० करोड ब्यारल तेल ट्रान्जिटमा भएको बताएको छ।

खाडीमा कम्तीमा थप तीनवटा तेलवाहक पानीजहाज आक्रमणमा परेपछि बिहीवार विश्व बजारमा तेलको मूल्य फेरि प्रतिब्यारल १०० डलर नाघेको थियो।

तेल ढुवानी गर्न प्रयोग हुने जलमार्गमा इरानले अवरोध सिर्जना गर्दै र मालवाहक पानीजहाजहरूमा आक्रमण गर्दै आएको छ। खाडीमा तेल उत्पादन गर्ने स्थलहरू पनि आक्रमणको निसानामा परेका छन्।

इरानका नवनियुक्त सर्वोच्च नेता मुज्तबा खामेनेईले तेल ढुवानी गर्न प्रयोग गरिने एउटा मुख्य मार्ग स्ट्रेट अप होर्मुजमा अवरोध गरिराख्ने उद्घोष गर्नुभएको छ।

उक्त साँघुरो जलमार्ग हुँदै विश्वभरि प्रयोग गरिने झन्डै २० प्रतिशत तेल निर्यात हुन्छ।

युद्धका कारण तेलवाहक पानीजहाजहरू खाडीमा अलपत्र परेका छन्। तिनले इरान र ओमानका बीच रहेको साँघुरो जलमार्ग छिचोल्न नसकेपछि तेल आपूर्ति प्रभावित भएको छ।

बेसन्टले हाल तेलको मूल्यवृद्धि भए पनि त्यसबाट अमेरिका र अमेरिकी अर्थतन्त्रलाई दीर्घकालीन लाभ हुने तर्क गरेका छन्।

बुधवार अमेरिकाले १७.२ करोड लिटर तेल आफ्नो रणनीतिक भण्डारबाट प्रयोग गर्ने घोषणा गरेको थियो।

यसअघि बेसन्टले स्ट्रेट अफ होर्मुज हुँदै तेल ओसार्ने पानीजहाजहरूलाई अमेरिका सरकारले सैन्य हिसाबले सम्भव भएसम्म यथाशीघ्र सुरक्षा दिने बताउनुभएको थियो ।सैन्य सुरक्षा आवश्यक हुन सक्ने कुरा हाम्रो योजनामै थियो, उहाँले स्काई न्यूजलाई बताउनुभयो।

के छ प्रतिक्रिया

रुसी राष्ट्रपति भ्लादिमिर पुटिनका आर्थिक दूत किरिल दिमित्रिएभले रुसी तेलबिना विश्वको ऊर्जाबजार स्थिर हुन नसक्ने बताउनुभएको छ।

“अमेरिका वास्तविक कुरा बुझ्दै छ ( रुसी तेलबिना विश्वको ऊर्जाबजार स्थिर हुन सक्दैन”, उहाँले टेलिग्राममा लेख्नुभएको छ ।

यद्यपि भ्रष्टाचारको आरोप लागेका वरिष्ठ रुसी अधिकारीहरूमाथि प्रतिबन्ध लगाउनुपर्ने पक्षमा अभियान चलाएका लगानीकर्ता बिल ब्राउडरले रुसी तेल किन्ने अनुमति दिने निर्णयलाई भयानकको सङ्ज्ञा दिनुभएको छ। उहाँले पहिला मस्कोमा बसेर लगानी गर्नुभएको थियो।

“….यसले पुटिनलाई धनी बनाउँछ र युक्रेनमा जारी युद्ध लम्ब्याउँछ”, उहाँले बीबीसीसँग भन्नुभयो।

युक्रेनले अमेरिकाको निर्णयबारे कुनै प्रतिक्रिया व्यक्त गरिसकेको छैन। तर युक्रेनी राष्ट्रपति भोलोदिमिर जेलेन्स्कीले प्रतिबन्ध खुकुलो बनाइए त्यो युक्रेनका लागि गम्भीर प्रहार र रुसका लागि थप हतियार किन्न पाउने गरी दिइने सुविधा हुने बताउनुभएको थियो ।

फ्रान्सका राष्ट्रपति इमानुएल माक्रोँले स्ट्रेट अफ होर्मुज बन्द हुँदैमा रुसी प्रतिबन्ध हटाउनु कुनै तरिकाले पनि न्यायोचित नभएको टिप्पणी गर्नुभएको छ ।