क्यालिफोर्निया(संयुक्त राज्य अमेरिका), ३ आषाढ । फिफा विश्वकप २०२६ को समूह जे अन्तर्गत क्यालिफोर्नियाको सान फ्रान्सिस्को बे एरिया स्टेडियममा आज भएको खेलमा अस्ट्रियाले विश्वकपमा डेब्यु गरिरहेको जोर्डनलाई ३–१ गोल अन्तरले पराजित गरेको छ।
२८ वर्षपछि विश्वकपमा फर्किएको अस्ट्रियाका लागि यो जित महत्त्वपूर्ण रह्यो। पराजित भए पनि जोर्डनले विश्वकपको इतिहासमा आफ्नो पहिलो गोल दर्ता गर्दै ऐतिहासिक क्षण मनाएको छ।
खेलको २१औँ मिनेटमा अस्ट्रियाका रोमानो श्मिडले बक्स बाहिरबाट उत्कृष्ट प्रहार गर्दै गोल गरे र टोलीलाई १–० को सुरुवाती अग्रता दिलाए। दोस्रो हाफको सुरुवातमै जोर्डनका अली ओल्वानले उत्कृष्ट काउन्टर अट्याकलाई गोलमा परिणत गर्दै खेल १–१ को बराबरीमा ल्याए। यो गोल जोर्डनको विश्वकप इतिहासकै पहिलो गोल बन्न पुग्यो।
तर, खेलको ७५औँ मिनेटमा जोर्डनका डिफेन्डर याजान अबु अल अरबको आत्मघाती गोलका कारण अस्ट्रियाले पुनः २–१ को अग्रता लियो। खेलको इन्जुरी समयमा प्राप्त पेनाल्टीलाई अनुभवी स्ट्राइकर मार्को अर्नाउटोभिचले गोलमा परिणत गर्दै अस्ट्रियाको ३–१ को जित सुनिश्चित गरे।
