काठमाडौँ, २६ भदौः काठमाडौँ रेड्स नेपाल भलिबल लिग (एनभिएल) २०२६ को प्लेअफमा प्रवेश गरेको छ । बिहीबार सम्पन्न खेलको नतिजासँगै काठमाडौँले प्लेअफमा स्थान बनाएको हो ।

काठमाडौँले अन्तिम खेलमा खप्तड फाल्कोन्सविरुद्ध खेल्नुअघि नै प्लेअफमा स्थान सुरक्षित गरिसकेको थियो । उसले लिग चरणको पाँचौँ खेल पनि जित्दै आफ्नो लय कायमै राख्यो ।

काठमाडौँले खप्तडविरुद्धको खेल ३–२ सेटले जितेको हो । त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा भएको खेलमा खप्तडले सुरुआती अग्रता लिए पनि उसले त्यसलाई निरन्तरता दिन सकेन । खप्तडले पहिलो सेट २५–१९ ले जितेको थियो ।

दोस्रो सेटमा काठमाडौँले उत्कृष्ट पुनरागमन गर्दै २५–१८ को जित निकाल्यो । यस्तै, तेस्रो सेटमा खप्तड २५–१९ ले विजयी हुँदा खेल रोमाञ्चक अवस्थामा पुग्यो । अन्तिम तथा पाँचौँ सेट काठमाडौँले १५–१३ ले आफ्नो पक्षमा पार्दै खेल जित्यो ।

जारी प्रतियोगितामा काठमाडौँको यो चौथो जित हो । उसले एक खेलमा मात्र हार व्यहोरेको छ । उता खप्तड फाल्कोन्सले भने यस सिजनमा एउटा खेल पनि जित्न सकेन । खप्तड तालिकाको पुछारमा रहँदै प्रतियोगिताबाट बाहिरिएको छ ।

भदौ २७ गतेसम्म सञ्चालन हुने जारी लिगको विजेता टोलीले रु २० लाखबराबरको पुरस्कार प्राप्त गर्नेछ ।
–––