कीर्तिपुर, १ पुस । पहिलो अन्तर्राष्ट्रिय ह्विल चेयर क्रिकेटको उपाधि नेपालले जितेको छ। त्रिवि क्रिकेट मैदान कीर्तिपुरमा शनिबार भएको फाइनलमा बंगलादेशलाई ५४ रनले हराउँदै नेपालले उपाधी जितेको हो।
टस हारेर पहिले ब्याटिङ गरेको नेपालले निर्धारित २० ओभरमा ३ विकेट गुमाउँदै १६० रन बनाएको थियो । नेपालका लागि दिगम चेम्जोङले अविजित ७९ रनको योगदान दिए। ६२ बल खेलेका उनले १० चौका प्रहार गरेका थिए।
यस्तै नवीन राईले ५९ रन बनाए। ५२ बल खेलेका उनले ८ चौका प्रहार गरे।
जंगबहादुर थापा ४ रनमा एलबिडब्लुको धरापमा परे भने विपिन पौडेल १ रनमा अविजित रहे।
खेलमा बंगलादेशका रिपोन उदिनले २ विकेट लिएका थिए ।
१६१ रनको लक्ष्यसहित मैदानमा उत्रिएको बंगलादेशले १८.२ ओभरमा अलआउट हुँदै १०६ रनमा समेटियो।
नेपालका विपिन पौडेलले ३ विकेट लिएर बंगलादेशलाई रोकेका थिए ।
फाइनल खेलमा म्यान अफ द म्याच दिगम चेम्जोङ भए।
यसअघि शुक्रबार सम्पन्न खेलमा नेपालले भारतलाई ६५ रनले पराजित गरी फाइनलको यात्रा तय गरेकोथियो। पहिलो खेलमा नेपालले बंगलादेशलाई ९ विकेटले हराएको थियो।
यस्तै प्रतियोगिता नविन राई उत्कृष्ट ब्याट्सम्यान भए। बेष्ट बलरको उपाधि विपिन पौडेलले हासिल गरे भने वेष्ट किपर राजु गुरूङले जिते। म्यान अफ दि सिरिजको उपाधि दिगेम लिम्बुले जिते। विजयी खेलाडीलाई राष्ट्रिय खेलकुद परिषदका सदस्यसचिव केशव विष्टले पुरस्कृत गरे।
ह्विलचियर क्रिकेट संघको आयोजनामा भएको त्रिकोणात्क टि ट्वान्टी क्रिकेट प्रतियोगितामा नेपाली टिमको कप्तानी हिमाल आर्यालले निभाएका थिए।
प्रतियोगितामा सुशील कोइराला मेमोरियल फाउन्डेसनको सहयोग रहेको थियो ।
