क्वालालम्पुर(मलेशिया),३ बैशाख । आईसीसी यु १९ विश्वकप छनोट (एशिया) अन्तरगत नेपाली टीम र ओमानबीच भैरहेको खेलमा नेपालले ओमानसामु २ सय ३० रनको चुनौति प्रस्तुत गरेको छ ।
सेलाङ्गोर टर्फ क्लब क्वालालम्पुरमा भैरहेको खेलमा टस हारेर ब्याटिड.को निम्तो पाएको नेपालले निर्धारित ५० ओभरको खेलमा ४४ औं ओभरको दोस्रो बलमा अल आउट हुँदै २ सय २९ रन बनाएको थियो ।
नेपालका पहिलो नम्बरमा रहेका ब्याट्सम्यानहरु सस्तैमा बाहिरिदा नेपालले पूरा ओभर खेल्न सकेन ।
नेपालले आज राम्रो सुरुवात गर्न सकेन् । ओपनर ऋत गौतम र पवन सर्राफको जोडी मैदानमा टिक्न सकेन । नेपालका पवन सर्राफ ५ रनमा आउट भए भने ऋत गौतम १० रनमा पेभेलियन फर्किए । १२ रनमा पहिलो विकेट गुमाएको नेपालले ३३ रन बनाउदा दोस्रो विकेट खेर फाल्यो ।आजको खेलमा डेब्यु गरेका अभिनाश बस्नेत १५ रनमा आउट भएपछि स्कोर ६२ रन हुँदा नेपालको तेस्रो विकेट झर्यो ।
त्यसपछि नेपालको स्कोर ७५ पुग्दा भरपर्दा मानिएका खेलाडी सन्दीप जोरा ४ रनमा आउट भएपछि नेपालले चौथो विकेट गुमायो ।
त्यसपछि पनि नेपालको विकेट झर्ने क्रम रोकिएन । डेब्यु खेलमा अर्धशतक बनाएका हरि चौहान २ रनमा आउट भए । ८९ रनमा पाँच विकेट गुमाएपछि नेपाल निकै चर्को दवावमा परेको थियो ।
त्यसपछि ब्याट सम्हालेका कप्तान रोहितकुमार पौडेल र भिम सार्कीबीच ९२ रनको साझेदारी भएपछि नेपाल बलियो स्थितिमा पुग्यो । तर कप्तान रोहित ७५ रनमा आउट हुन पुगे पछि भिम पनि लगत्तै ३९ रनमा बाहिरिए ।
नेपालले १ सय ७५ रनमा सात विकेट गुमाइसकेको थियो। तर त्यसपछि आएका कुशल मल्लपनि २ रनमा आउट भएपछि आठौं विकेट गयो । लगत्तै कमलसिंह ऐरी १ रनमा आउट भएपछि नेपालले नबौ विकेट गुमायो ।
१० औं विकेट जोगाउदै प्रतिश जिसी र सूर्य तामाड.ले पारि सम्हाले । अन्तिममा प्रतिश जिशीले विस्फोटक ४१ रन बनाएपछि नेपालले बलियो लक्ष्य दिन सफल भयो ।
प्रतियोगिता अन्तरगत हालसम्म सम्पन्न ३ खेलमा दुईमा जित र १ मा हार व्यहोर्दै नेपाल ४ अंकसहित अंकतालिकाको दोस्रो स्थानमा रहेको छ ।
प्रतियोगितामा ओमानले ३ खेल खेल्दा १ जित र २ हार बेहोरेको छ र अंकतालिकामा चौथो स्थानमा रहेको छ।
ओमानले कुवेतसंग पहिलो खेलमा ८ विकेटको पराजय बेहोरेको थियो जसपछि दोश्रो खेलमा मलेसियालाई ४६ रनले पराजित गरेको थियो।
सोमबार भएको तेश्रो खेलमा बर्षाले बाधा पुर्याएपछि भएको डी /एल मेथडको नतिजामा ओमानलाई सिंगापुरले ५ विकेटले पराजित गरेको थियो।
ICC Asia Under-19s World Cup Qualifier
| TEAM | M | W | L | PT | NRR |
|---|---|---|---|---|---|
| UAE19 | 3 | 3 | 0 | 6 | 1.598 |
| NEP19 | 3 | 2 | 1 | 4 | 3.209 |
| Kuw19 | 3 | 2 | 1 | 4 | 0.416 |
| Omn19 | 3 | 1 | 2 | 2 | -0.936 |
| SIN19 | 3 | 1 | 2 | 2 | -2.568 |
| MAL19 | 3 | 0 | 3 | 0 | -2.039 |
अंकतालिकामा नेपाल दोश्रो स्थानमा रहेको छ भने युएई ३ खेलमा शतप्रतिशत जित सहित पहिलो स्थानमा रहेको छ। ३ खेलमा २ जित र १ हार बेहोरेको कुवेत नेपाल भन्दा नेट रनरेटमा पछि पर्दै तेश्रो स्थानमा रहेको छ।
विश्वकप छनौट हुने सम्भावना कायम राख्न नेपालले प्रतियोगिताको बाँकी खेल जितेर मात्रै हुनेछैन त्यो संगै युएईले कम्तिमा १ खेल हार्न समेत पर्नेछ।
प्रतियोगितामा बलियो देखिएको युएईले मंगलवार सिंगापुरको र बिहिबार ओमानको सामना गर्नेछ।
नेपालले प्रतियोगितामा अप्रिल १८ बिहिबार कुवेतसंग प्रतिस्पर्धा गर्नेछ।
मलेशियामा भैरहेको विश्वकप एशिया छनौट खेलमा बर्षाले खेलको नतिजा यताउता पारेको छ ।
नेपाल र युएईको खेलमा बर्षाले युएईलाई फाइदा भए जस्तै हिजोको ओमान र सिंगापुरको खेलमा सिंगापुरलाई फाइदा भएको छ ।
यस्तै चमत्कारिक प्राकृतिक न्याय भएर युएईले एक खेल हारेमा नेपालको विश्वकप सपना साकार बन्नेछ नत्र युएई तगारो हुने देखिन्छ ।
