कठमाडौं, २० पौष । रेडक्रस सोसाइटी चाइना र नेपाल रेडक्रस सोसाइटीबीच केन्द्रीय गोदामघर निर्माणसम्बन्धी सहयोग सम्झौतामा बिहिबार काठमाडौंमा हस्ताक्षर भएको छ ।
सम्झौता पत्रमा चाइना रेडक्रसका तर्फबाट चाइनिज रेडक्रसका उपाध्यक्ष वाङ हाइजिङ र नेपाल रेडक्रस सोसाइटीका तर्फबाट महामन्त्री देवरत्न धाख्वाले हस्ताक्षर गरेका हुन ।
सम्झौता अनुसार रेडक्रस सोसाइटी चाइनाको आर्थिक सहयोगमा भक्तपुरमा केन्द्रीय गोदामघरको निर्माण हुँनेछ ।
केन्द्रीय कार्यालयमा आयोजित हस्ताक्षर कार्यक्रममा बोल्दै चाइना रेडक्रसका उपाध्यक्ष वाङ हाइजिङले नेपाल रेडक्रसलाई गोदाम निर्माणका साथै अन्य क्षेत्रमा पनि सहयोग गर्न चाइना रेडक्रस तयार रहेको बताए ।
कार्यक्रममा नेपाल रेडक्रस सोसाइटीका अध्यक्ष संजीव थापाले नेपाल रेडक्रसले विपद्को लागि पूर्वतयारी गरे पनि २०७२ सालको भूकम्पको समयमा ठूलो मात्रामा सहयोग गर्न ठूलो गोदामघरको आवश्यकता महसूस भएपछि चाइना रेडक्रस समक्ष गोदाम निर्माणको लागि प्रस्ताव गरिएको बताए ।
उनले भूकम्पका बेला चाइना रेडक्रसले पु¥याएको आर्थिक र सामग्रीगत सहयोगको प्रशंसा पनि गरे ।
यस्तै सोसाइटीका महामन्त्री देवरत्न धाख्वाले नेपाल रेडक्रसको सन् २०२० सम्मको विकास योजना अनुसार यो गोदामघर निर्माण परियोजना प्रस्तुत गरिएको बताए ।
संझौता हस्ताक्षर कार्यक्रममा नेपाल रेडक्रस सोसाइटीका कोषाध्यक्ष देवेन्द्रबहादुर प्रधान, उपमहामन्त्री हरिप्रसाद न्यौपाने, भूकम्प प्रतिकार्य कार्यक्रमका प्रमुख उमेश ढकाल, कार्यकारी निर्देशक इन्द्रबहादुर केसीलगायत अन्य कर्मचारीहरुको उपस्थिति रहेको थियो ।
प्रस्तावित भवनको विस्तृत डिजायन ३ महिनाभित्र तयार हुनेछ । रु। १३ करोडको लागतमा दुईवर्षभित्र गोदामघर निर्माण सम्पन्न गरी आवश्यक उपकरणहरुको समेत व्यवस्था गरिनेछ ।
रेडक्रस सोसाइटी चाइनाका उपाध्यक्ष वाङ हाइजिङका नेतृत्वमा नेपालको तीन दिने भ्रमणमा आएको प्रतिनिधिमण्डलले बिहिबार नै भक्तपुरस्थित गोदामघर निर्माण स्थलको अवलोकन समेत गरेको छ । शुक्रबार प्रतिनिधि मण्डलले काभ्रेका भूकम्प प्रभावित समुदायहरुको अवलोकन गर्नेछ । प्रतिनिधिमण्डलमा चाइना रेडक्रसका डेपुटी डाइरेक्टर, इन्टरन्यासनल कोओपरशेन डिभिजन प्रमुख सम्मिलित छन् ।
