काठमाडौं, १७ साउन । शुक्रबार ‘रातो गलबन्दी’ र ‘न यता न उता’ प्रदर्शनमा आएका छन् । यी दुई फिल्ममा दुई चलेका अभिनेत्रीको अभिनय छ ।
कमेडी फिल्म ‘न यता न उता’ मा भर्सटायल अभिनेत्री ऋचा शर्मा र ‘रातो गलबन्दी’ मा अभिनेत्री केकी अधिकारीको प्रमुख भूमिका छ । दुई अर्धबैशे पुरुषको कथा वाचन गर्ने ‘न यता न उता’ मा ऋचाका अलावा मिराज रोश, समिर दिक्षित, छुल्ठिम गुरुङ, बुद्धि तामाङ, रविन्द्र झा, सिल्सा जिरेल, राजाराम पौडेल, कमलमणी नेपाल, जीवन भट्टराई, किरण राई, नमिता घिसिङ, भिमा मैनाली, राजन खतिवडा, जयनन्द लामालगायतको अभिनय छ । मिराज रोशले फिल्म निर्देशन गरेका हुन् ।
फिल्ममा अरोन अशोक कुमारको छायांकन छ । फिल्ममा दुई अर्धबैशे पुरुषको जीवनमा आइपरेको संकटलाई हास्य रुपमा दर्शाइएको निर्देशक मिराजले बताएका छन् । यस फिल्मले उठाएको कथा नेपाली फिल्ममा नै पहिलो पटक रहेको उनको भनाई छ । रिना लामाले फिल्मको निर्माण गरेका हुन् । बिहीबार साँझ राजधानीमा भएको प्रिमियरमा फिल्मलाई सुखद प्रतिक्रिया मिलेको छ । सेलिब्रेटीहरुले फिल्म रचाएका छन् ।
त्यस्तै, ‘रातो गलबन्दी’ मा केकी अधिकारी र कोशिश क्षेत्रीको प्रमुख अभियना रहेकोछ । बुद्धि तामाङको पनि अभिनय रहेको फिल्मको कथा किरण माइकलले लेखेका हुन् । अनिश थापाको निर्देशन रहेको रातो गलबन्दी सुमन तामाङले खिचेका हुन् । यस फिल्मकोे कार्यकारी निर्माता प्रकाश दुलाल हुन् । फिल्ममा बासुदेव घिमिरे, अमृता मगैराम र कृष्ण घिमिरे सहनिर्मातामा रहेका छन् ।
