काठमाडौै, ६ भाद्र । भारतीय अभिनेत्री सन्नी लियोनी नेपाली फिल्म ‘पासवर्ड’ को प्रिमियर प्रदर्शनको लागि नेपाल आउने भएकी छन् ।
सन्नीले नेपाली कथानक चलचित्र पासवर्डको ‘आजको शाम’ बोलको गीतमा कामुक नृत्य दिएकी छन् ।
दुई महिना अगाडि यूट्युब रिलिज भएको यो गीतलाई अहिलेसम्म ४० लाखभन्दा बढी दर्शकहरुले हेरिसकेका छन् ।
भाद्र २७ देखि प्रदर्शनमा आउने फिल्म ‘पासवर्ड’ को तीन दिन अगाडि राजधानीमा प्रिमियर प्रदर्शन हुँदैछ । सन्नी त्यसैका लागि भारतबाट नेपाल आउन लागेकी हुन ।
उनले मंगलबार साँझ एक भिडियो सन्देशमार्फत् उनले आफू फिल्मको प्रिमियरमा सहभागी हुन नेपाल आउन लागेको जानकारी दिएकी छन् ।
‘नमस्ते नेपाल । म सन्नी लियोनी । मैले अभिनय गरेको नेपाली फिचर फिल्म ‘पासवर्ड’ को प्रमोसनल इभेन्ट र प्रिमियरमा सहभागी हुन म सेप्टेम्बर ११ मा नेपाल आउँदैछु’, उनले भिडियोमा भनेकी छन् । सन्नीले फिल्म निर्माण गरेको ब्यानर एबी इन्टरनेसनललाई सफलताको शुभकामना पनि दिएकी छन् । सन्नी यसपटक तीन दिन नेपाल बस्ने कार्यक्रम छ ।
फिल्मको प्रिमियरमा सहभागी हुनुपर्ने सर्तसहित निर्माण टिमले सन्नीलाई सो गीतमा नाच्नका लागि ३ करोड नेपाली रुपैया पारिश्रमिक दिएको थियो ।
यो फिल्ममा उनको आइटम नृत्यसँगै अभिनय पनि रहेको बताइएको छ ।
अघिकांश छायांकन लण्डनमा भएको पासवर्डमा अनुप विक्रम शाही, रविन्द्र झा, बुद्धि तामाङ, धिरेन शाक्य, विक्रम जोशी, छुल्ठिम गुरुङलगायतका कलाकारहरुको अभिनय रहेको छ । फिल्मलाई हिरल जोशी र अमित बस्नेतले निर्माण गरेका हुन् । अंकित गौतम कार्यकारी निर्माता रहेको फिल्ममा अजित के। थापा सहनिर्माताको रुपमा रहेका छन् । सम्राट लामाको निर्देशनमा बनेको यस फिल्मको छायांकन सौरभ लामा गरेका हुन् ।
