मुम्बई(भारत) । फिल्म ‘बाहुबली १ र २ बाट भारत र हिन्दी सिनेमा हेर्ने र बुझ्ने दर्शकको अपार मन जितेका नायक प्रभासले अब त्यस्तै समय लाग्ने फिल्ममा अवसर आए पनि नगर्ने कुरा बताएका छन् ।
उनले हालै एक सार्वजनिक कार्यक्रममा भनेका छन् ‘बाहुबली मेरो जीवनको सबैभन्दा ठूलो र सार्थक फिल्म हो । जसले मेरो करिअर राम्रो बनाउन निकै मद्दत गरेको छ । यो फिल्मले धेरै दर्शकको प्रशंसा पनि पाएको थियो । तर, अबदेखि म कहिल्यै यस्तो फिल्म गर्दिनँ ।’
बाहुबली फिल्म पूरा गर्न ५ वर्ष लागेको थियो । यो समय अभिनेताको लागि धेरै लामो भएको उनको निश्कर्ष छ । अभिनेतासँग एकदमै कम समय हुने र थोरै समयमा धेरै फिल्म गर्नुपर्ने भएकोले ५ वर्ष लामो समय एउटा फिल्मलाई दिन नसक्ने उनको तर्क छ ।
बाहुबली भारतीय फिल्म इतिहासमा निर्माण खर्च र आम्दानी दुवै हिसाबले किर्तिमान कायम गरेको फिल्म हो । यो फिल्मका हरेक कलाकारलाई दर्शकले मन पराएका थिए ।
बाहुबली चर्चित भारतीय निर्देशक एस राजामौलीको निर्देशनमा निर्माण भएको थियो ।
