काठमाडौं, १४ फागुन । साताको चौथो दिन बुधवार पनि नेपाल स्टक एक्सचेञ्ज (नेप्से) ले कारोबारमा नयाँ रेकर्ड कायम भएको छ ।

बुधबार नेप्से ५०.९३ अंकले बढेर १ हजार ५ सय ९६ दशमलब ४३ विन्दुमा कायम भएको छ । बुधबार सेयर बजारमा ४ अर्ब १५ करोड ४८ लाख ८३ हजारको कारोबार भएको छ । जुन नेपाल स्टक एक्सचेञ्जको अहिलेसम्मको इतिहासकै सबैभन्दा बढी कारोबार हो ।

बुधबार बजारमा १ सय ८० कम्पनीको ९९ लाख ६ हजार ९८९ कित्ता सेयर किनबेच भएको छ ।

नेप्से परिसूचक बढेसँगै बुधबार एभरेष्ट बैंकको परिवर्तिय अग्राधिकार शेयर, राष्ट्रिय बीमा कम्पनी कम्पनी, युनिलिभर नेपाल र कालिका पावर कम्पनीको शेयरमूल्यमा सकारात्मक सर्किट लागेको छ।त्यसैगरी, यस दिन गुराँस लाइफ इन्स्योरेन्स, राष्ट्रिय बीमा कम्पनीको संस्थापक शेयर, सिभिल लघुवित्त र जोशी हाइड्रोपावरको शेयरमूल्य ९ प्रतिशतभन्दा बढी बढेको छ।

राधी विद्युत कम्पनीको शेयरमूल्य यस दिन सर्वाधिक ८.२९ प्रतिशत घटेको छ। त्यसैगरी, अरुण भ्याली हाइड्रोपावरको शेयरमूल्य ७.९६ प्रतिशत घटेको छ।

बुधबार ८ वटा कम्पनीको १० करोड भन्दा माथिको सेयर किनबेच भएको छ । कारोबार रकमका हिसाबले सबैभन्दा बढी रकमको सेयर कारोबार हुनेमा नेपाल लाइफ इन्स्योरेन्सपरेको छ । यसको २१ करोड ९९ लाख रुपैयाँ बराबरको सेयर किनबेच भएको छ । बुधबार शिवम् सिमेन्ट्स, नेपाल बैंक, हिमालयन डिष्टिलरी, नेको इन्स्योरेन्स, नेपाल इन्स्योरेन्स, गुराँस लाइफ इन्स्योरेन्स र एनआईसी एशियाको कारोबार रकम १० करोड नाघेको छ।