रोम(इटाली), ९ चैत्र । विश्वमा महामारीको रुपमा फैलिदै गएको कोरोना भाइरसको संक्रमणबाट इटलीमा शनिबार मात्रै थप ७ सय ९३ जनाले जीवन गुमाएका छन् । यो कोरोनाको कारण कुनै एक देशमा एकै दिन मृत्यु हुने विरामीहरुको सबैभन्दा ठूलो संख्या हो ।

शनिबार जीवन गुमाएकासहित कोरोनाबाट इटलीमा ज्यान गुमाउनेको संख्या ४ हजार ८ सय २५ पुगेको छ । यो संख्या कोरोनाको उद्गमस्थल चीनको भन्दा १ हजार ५ सय ६४ ले बढी हो ।

चीनका स्थानीय जनतामा नयाँ संक्रमण रोकिएको बेला इटलीमा भने संक्रमण दर पनि बढेको छ । बितेको २४ घण्टामा मात्रै यहाँका ६ हजार ५ सय ५७ मानिसमा कोरोनाको संक्रमण भेटिएको छ । योसँगै कुल संक्रमितको संख्या ५३ हजार ५ सय ७८ पुगेको छ । यीमध्ये २ हजार ८ सय ५७ को अवस्था गम्भीर रहेको बताइएको छ ।

कोरोनाको संक्रमण अनपेक्षित रुपमा ज्यामितीय रुपमा विस्तारित हुँदै गएपछि शनिवार इटालीका प्रधानमन्त्री गुइसेप कोन्टेले फेसबुकबाट प्रत्यक्ष सम्बोधन गर्दै देश दोस्रो विश्वयुद्धपछिको सबैभन्दा गम्भीर संकटको अवस्थामा रहेको बताउनुभएको छ । उहाँले देशका अत्यावश्यक बाहेक सबैक्षेत्रका उत्पादन उद्योगहरु बन्द गर्न अपील गर्नुभएको छ । यो प्रतिबन्ध खाद्यान्न र औषधी उत्पादनभन्दा बाहेकका सबै उद्योगहरुका लाग्नेछ ।

उहाँले बडो भावुक हुँदै भन्नुभएको छ, ‘जुन मृत्यको खबर हामी हरेक दिन निरन्तर सुनिरहेका छौ, ती संख्यामात्रै होइनन्,ती त हाम्रा नागरिक हुन् । सबै औषधी पसलहरु,खाद्य स्टोर्स,वित्तिय सेवा र सार्वजनिक यातायातहरु भने खुला हुनेछन् ।’

उहाँले भन्नुभएको छ, ‘यी नयाँ मापदण्डहरुले मुुलुकलाई छिट्टै कोरोनामुक्त बनाउन सहयोग गर्नेछन् र हामीलाई हाम्रा उद्योगमा,हाम्रो पिज्जा फर्कन आफ्ना प्रियजनलाई अंंकमाल गर्ने अवस्था पुर्याउन मद्दत गर्नेछन् । हामीले यो किन गरेका छौ भने हामी इटालीलाई अतिसय माया गर्दछौ ।’

 लोम्बर्डी क्षेत्रमा कडा नियम

यसैबीच चीनको राष्ट्रिय स्वास्थ्य आयोगले शनिवारको अन्तसम्म चीनमा ६ जनाको मृत्यु भएको र ४६ नयाँ संक्रमण भेटिएको जनाएको छ । यी कुनै पनि घट्नाहरु कोरोनाको उद्गम स्थल हुवेइमा नभई बाहिर भेटिका हुन् । हुवेइमा विगत ४ दिनदेखि कुनै पनि नयाँ संक्रमण देखिएको छैन ।

यी ४६ नयाँ संक्रमणका घट्नामा ४५ जनाको संक्रमणबाहिरबाट आएको हो । कोरोना संक्रमण सुरुभएपछि बाहिरबाट चीन आउने नागरिकमध्ये ३ सय १४ जनामा यस्तो संक्रमण देखिएको छ ।

कोरोनाबाट हुवेइमा ३ हजार १ सय ४४ ले जीवन गुमाएका छन् भने चीनमा जीवन गुमाउनेकोे कुल संख्या ३ हजार २ सय ६१ रहेको छ । चीनमा कूल संक्रमितको संख्या ८१ हजार ५४ रहेको र ७२ हजार २ सय ४४ जना उपचारपछि कोरोनामुक्त भएको त्यहाँको राष्ट्रिय स्वास्थ्य आयोगले जनाएको छ ।

कोरोना भाइरसको संक्रमण र यसबाट भएको मृत्युको निरन्तर निगरानी राख्दै आएको जोन हप्किन्स विश्वविद्यालयका अनुसार वितेको हप्ता कोरोना भाइरसका संक्रमणका घट्नाहरु दोब्बर भएका छन् र विश्वको ३ लाखभन्दा बढीमा यो संक्रमण देखिएको छ । अघिल्लो हप्ता जम्मा १ लाख ५६ हजार ३ सय ९६ मा यो संक्रमण सीमित थियो ।

कोभिड १९ बाट मर्नेहरुको संख्या पनि पछिल्लो हप्ता दोब्बरभन्दा बढी भएको छ । अघिल्लो हप्ता यसको कारणबाट जीवन गुमाउनेको संख्या ५ हजार ८ सय ३३ थियो तर पछिल्लो हप्ता १२ हजार ९ सय ४४ को पुग्यो ।

यसै बीच दक्षिण अमेरिकी देश बोलिभियाले पनि पूरै देशलाई १४ दिन क्वारेन्टाइनमा राख्ने घोषणा गरेको छ। बोलिभियाका अन्तरिम राष्ट्रपति जेनाइन अनेजले बोलिभियाका सबै नागरिकलाई २४ घण्टा घरमै रहन र हरेक परिवारबाट एकजना मात्र किनमेलमा निस्कन आग्रह गर्नुभएको छ । त्यहाँ सार्वजनिक र निजी सवारी यातायात निलम्बन गरिएको छ ।

स्पेनका प्रधानमन्त्री पेड्रो साञ्जेनले देशवासीलाई अझ दृढताका साथ कोरोनाविरुद्धको लडाइको सामना गर्न अनुरोध गर्दै सबैभन्दा खराब अवस्था आउन बाँकी रहेकोमा सचेत गराउनु भएको छ । स्पेनमा १९ हजारभन्दा बढीमा संक्रमण देखिएको छ ।

कुवेतका उपप्रधान तथा आन्तरिक मामिला मन्त्री अनस अल सलेहले आइतबार अपरान्ह ५ बजेदेखि ११ घण्टे कर्फयू आदेश जारी गर्नुभएको छ ।

चिलीमा कोरोना भाइरसको कारण ८२ बर्षे बृद्धको देहान्त भएको छ । यो चिलीको पहिलो कोरोना पीडित मृत्यु हो ।