काठमाडौं, ९ माघ । निर्माण व्यवसायी महासंघका अध्यक्ष शरदकुमार गौचनलाई गोली प्रहार गर्ने सुटर बाघमारे भनिने श्यामबहादुर गोम्बी गुरुड.लाई प्रहरीले पक्राउ गरेको छ ।
प्रहरीको केन्द्रीय अनुसन्धान ब्यूरो (सीआईबी) ले मंगलबार बिहान गोम्बेलाई पक्राउ गरेको हो । गौचनको गत २३ असोजमा काठमाडौंको मिनभवन नजिकै खरिबोट क्षेत्रमा दिउसै गोली हानी हत्या गरिएको थियो ।
गौचनलाई गोली प्रहार गर्ने अर्का सुटर अमरबहादुर राणा अझै फरार छन् । उनीहरु दुवै जना सेनाका भगौडा हुन् ।
यसअघि प्रहरीले गौचन हत्याका मुख्य योजनाकार समिरमान सिंह बस्न्यातसहित ११ जनालाई पक्राउ गरिसकेको छ ।
प्रहरीले बारा जिल्लाको गढीमाई नगरपालिका, वडा नं. १ पथलैया घर भै हाल चितवन जिल्ला भरतपुर महानगरपालिका बडा नं १३ चम्पानगरमा बस्ने खेमराज गोम्बीको नाति लिला बहादुर गोम्बीको छोरा बर्ष ३२ को बागमारे भन्ने श्याम बहादुर गोम्बी गुरुङ्गलाई , चम्पानगर स्थित निजकै डेरा कोठाबाट माघ ८ गते पक्राउ गरी आबश्यक कारबाहीको महानगरीय प्रहरी परिसर, टेकुमा पठाईएको जनाइएको छ ।
प्रहरीले उनी रुपेन्देही जिल्लाको देवदह खैरहनीमा दुर्गा तिवारीलाई गोली प्रहार गरी हत्या गरेको घटनामा प्रत्यक्ष संलग्न भएको जनाएको छ ।
