काठमाडौँ, २४ आषाढ । नेपालमा विगत २४ घण्टामा थप २ सय ५५ जनामा कोरोनाभाइरस सङ्क्रमण पुष्टि भएको छ।
स्वास्थ्य तथा जनसंख्या मन्त्रालयले गरेको ‘प्रेस ब्रिफिङ’मा मन्त्रालयका प्रवक्ता डा. जागेश्वर गौतमले पछिल्लो २४ घन्टामा थप २ सय ५५ जनामा कोरोनाको संक्रमण देखिएको बताउनुभएको छ ।
योसँगै नेपालमा कुल संक्रमितहरुको संख्या १६ हजार ४ सय २३ पुगेको छ ।
तीमध्ये ७ हजार ७ सय ५२ जना निको भएका छन् भने ३५ जनाको मृत्यु भएको छ।
मन्त्रालयका प्रवक्ता डा. जागेश्वर गौतमका अनुसार विगत २४ घण्टामा २ सय ५३ जना भाइरसमुक्त गएर घर फर्किएको बताउनुभएको छ।
https://www.facebook.com/mohpnep/videos/270888677513294/
अहिले देशभरि आइसोलेशनमा ८ हजार ६ सय ३६ जना छन्। उनीहरू सक्रिय सङ्क्रमित हुन्।
गत असार १९ गते सर्वाधिक ७ सय ४० जनामा सङ्क्रमण पुष्टि भएको थियो।
सोमवार विगत पाँच हप्तामा सबैभन्दा कम १ सय ८० सङ्क्रमित फेला परेको मन्त्रालयले जनाएको छ।
बुधवार पुष्टि भएका सङ्क्रमित काठमाण्डू उपत्यकासहित विभिन्न जिल्लाका हुन्।
विगत २४ घण्टामा पीसीआर विधिबाट ४ हजार ६ सय ९६ वटा परीक्षण भएको मन्त्रालयले जनाएको छ।
यससँगै अहिलेसम्म पीसीआर विधिबाट भएका परीक्षणको सङ्ख्या २ लाख ६६ हजार ४ सय ५७ पुगेको छ।
अहिले देशभरि क्वारेन्टाइनमा २५ हजार ४० जना छन्।
नेपालमा कोरोनाभाइरस सङ्क्रमण
असार २४ गते बुधवार अपराह्ण ४ :३० बजेसम्मको तथ्याङ्क
- १६,४२३ कुल सङ्क्रमण
- २५३ विगत २४ घण्टामा घर फिर्ता
- विगत २४ घण्टामा पीसीआर परीक्षण ४,६९६
- सक्रिय सङ्क्रमित ८,६३६
- देशभरि क्वारन्टीनमा २५,०४०
- अहिलेसम्म निको ७,७५२
स्रोतः स्वास्थ्य तथा जनसङ्ख्या मन्त्रालय
देशका ७७ वटै जिल्लामा कोरोनाभाइरस पुगेको भए पनि मन्त्रालयका मङ्गलवार बताए अनुसार अहिले तेह्रथुम, भोजपुर, सोलुखुम्बु र हुम्ला जिल्लामा सक्रिय सङ्क्रमण भएका व्यक्तिको सङ्ख्या शून्य छ।
तर महोत्तरी, रौतहट, पाल्पा, अछाम, कैलाली र बाजुरामा सङ्क्रमितको सङ्ख्या ५ सय भन्दा बढी छ।
अहिलेसम्म कोरोनाभाइरसबाट प्रदेश नं २, ५ र कर्णाली प्रदेशमा सर्वाधिक सङ्ख्यामा मानिसहरू सङ्क्रमित भएका छन्।
सुदूरपश्चिम प्रदेशमा उल्लेख्य सङ्ख्यामा सङ्क्रमण बढेको छ। त्यहाँ सक्रिय सङ्क्रमण भएका व्यक्तिको सङ्ख्या अन्यत्रको भन्दा बढी भएको मन्त्रालयको तथ्याङ्कले देखाउँछ।
