नयाँ दिल्ली(भारत),१४ माघ । नेपाली क्रिकेटर सन्दीप लामिछाने इण्डियन प्रिमियर लिग (आईपिएल) को ११ औं संस्करणमा दिल्ली डेयरडेभिल्सबाट खेल्ने भएका छन् ।
आईपीएलका लागि हालै भएको अक्सनमा उनलाई २० लाख भारतीय रुपैयामा दिल्लीले किनेको थियो ।
्१७ बर्षिय सन्दिीपले आईपीएलमा थुप्रै भारतीय र विश्व स्टार क्रिकेटरहरुसँगै खेल्नेछन् । उनको टोलीमा भारतका पूर्व कप्तान तथा चर्चित ब्याट्सम्यान गौतम गम्भिर सहित विश्वचर्चित ब्याट्सम्यान ग्लेन म्याक्सवेल, बलर क्रिस मोरिस, अमित मिश्रा, जेसन रोय रहेका छन् ।
सन्दीपले आइपिएलमा दिल्लीबाट आफ्ना प्रदर्शनलाई विश्व क्रिकेट सामू पुराउने अवसर पाउने छन् ।
नेपाली क्रिकेटर सन्दीपलले सन् २०१६ को यु–१९ क्रिकेट विश्वकपमा आफ्नो जादु देखाईसकेका छन् । उनले विश्वकपमा आयरल्याण्डविरुद्ध एक्लैले पाँच विकेट लिएर नेपाली टोलीलाई जित समेत दिलाएका थिए ।
त्यतिबेला उनले ह्याट्रिक समेत पूरा गरेका थिए ।
उनको प्रदर्शनबाट प्रभावित अष्ट्रेलियाका पूर्वकप्तान तथा चर्चित ब्याट्सम्यान माइकल क्लार्कले उनलाई सिड्नी स्थानीय क्लबबाट खेल्न निम्तो समेत दिएका थिए ।
सिड्नीमा उनले क्रिकेटको थप प्रशिक्षण समेत लिएका थिए ।
