काठमाडौं, २६ असोज । गायक थिरज राईले एकपछि अर्को म्युजिक भिडियो दर्शक/श्रोतामाझ ल्याउनु भएको छ ।
उहाँको स्वर रहेको ‘दासी बनेर जिउने’ बोल गीतको भिडियो टीएनएसपीएम मिडियाले शनिबार साँझ युट्युबमार्फत सार्वजनिक गरेको छ ।
निर्देशक गोविन्द राईले जोन पुलामी मगर र उर्मिला गुरुङको जोडीलाई भिडियोमा रोमान्स गराउनुभएको छ । यसमा सचित राईको शब्द र गणेश चौधरीको संगीत समेटिएको छ । गायक राईले प्रेम र सुन्दरताको विषयवस्तु समेटिएको गजल प्याटर्नको गीत रहेको जानकारी दिनुभएको छ ।
यो गजल उहाँको तेस्रो गीति एल्बम ‘निमन्त्रणा’मा समेटिएको थियो । उक्त एल्बम केही वर्षअघि नै बजारमा आए पनि यसको भिडियो ढिलो गरी आएको उहाँले बताउनुभयो।
‘यसअघि दुईपटक सुटिङ गरे पनि विभिन्न कारणले भिडियो सार्वजनिक गर्न सकिएन’, उहाँले भन्नुभयो, ‘कोरोना महामारीका बेला भिडियो बनाउनु जुरेको रहेछ । दर्शक/श्रोताले मेरा अन्य गीतजस्तै दासीलाई पनि माया गरिदिनुहुन्छ भन्ने विश्वास छ ।’
उहाँले हालै ‘उदासी’ बोल गीतको भिडियो सार्वजनिक गर्नुभएको थियो । उक्त भिडियोमा पनि जोनलगायत कलाकारको अभिनय थियो । निर्देशक राईले स्रष्टाहरूको प्रतिभालाई सही तरिकाले मूल्यांकन गरिदिन दर्शक/श्रोतासमक्ष आग्रह गर्नुभएको छ ।
भिडियोको पोस्ट प्रोडक्सनको काम रेन्बो रेज मिडियाले गरेको छ ।
