काठमाडौं, २८ पौष । नेपाल कम्युनिष्ट पार्टी (नेकपा)को प्रचण्ड–माधव समूहले आज प्रदेश नम्बर २, गण्डकी र कर्णाली प्रदेशमा बृहत् कार्यकर्ता भेला आयोजना गर्दैछ।
प्रधानमन्त्री केपी शर्मा ओलीले प्रतिनिधिसभा विघटन गरेपछि त्यसको विरुद्ध दोस्रो चरणको संघर्षका कार्यक्रम गरिरहेको प्रचण्ड–नेपाल समूहले आज ३ वटा प्रदेशमा बृहत् कार्यकर्ता भेला तथा संघर्ष अभिमुखीकरण कार्यक्रम आयोजना गरेको हो।
गण्डकी प्रदेशको भेलामा अध्यक्षद्धय पुष्पकमल दाहाल प्रचण्ड, माधवकुमार नेपाल र प्रवक्ता नारायणकाजी श्रेष्ठले सम्बोधन गर्ने कार्यक्रम रहेको छ ।
प्रधानमन्त्री ओली विरोधी यो समूहले सोमबार प्रदेश १, लुम्बिनी र सुदूरपश्चिम प्रदेशमा बृहत् कार्यकर्ता भेला गरेको थियो।
केन्द्रीय संघर्ष समितिकी सहसंयोजक पम्फा भुसालका अनुसार प्रतिनिधिसभा विघटनको असंवैधानिक कदमका बारेमा कार्यकर्तालाई प्रशिक्षित गर्दै तल्लोतहसम्म प्रचारप्रसार गर्न यसप्रकारको कार्यक्रम आयोजना गरिएको हो ।
प्रचण्ड–माधव समूहले बुधबार बागमती प्रदेशमा बृहत कार्यकर्ता भेला गर्दैछ।
प्रतिनिधिसभा विघटनसँगै नेकपाको प्रचण्ड नेपाल समूहले दोस्रो चरणको विरोध कार्यक्रम अन्तरगत माघ २३ गतेसम्मका लागि संघर्षका कार्यक्रम सञ्चालन गरिरहेको छ।
