काठमाडौं, २० माघ । सौगात मल्ल र सृष्टि श्रेष्ठले भने अहिलेसम्म कुनै पनि फिल्ममा सँगै काम गरेका छैनन् तर राम्रो कथा र पटकथा पाएमा दुवै एकै फिल्ममा खेल्न तयार भएको खबर आएको छ ।
‘लालपुर्जा’ मा सृष्टिको अभिनय भएता पनि सौगातसँग भेट नहुँदै फिल्म अन्त्य भयो । यो फिल्म सफल भएको हुन्थ्यो भने दोस्रो भागमा यो जोडीलाई देख्न पाउने सम्भावना प्रवल थियो तर फिल्मले सोचे जस्तो दर्शकको माया पाएन। के दर्शकले अब यो जोडीलाई पर्दामा देख्न पाउने सम्भावना छ त ?
केही दिन अगाडि राजधानीमा आयोजित पत्रकार सम्मेलनमा नायक मल्लले आफूहरु राम्रो स्क्रिप्ट भए मात्र सँगै काम गर्ने खुलाए । उनले भने, ‘हामी दुईलाई राखेर फिल्म बनाउने भन्दै धेरै निर्माता(निर्देशक आउनु भएको छ । तर, हाम्रो कोशिश लटरपटर स्क्रिप्टमा काम नगर्ने भन्ने हो । हामी दुई जना भएपछि बेष्ट स्क्रिप्ट हुनु पर्छ ।’ यो भनाईले पनि सौगात, सृष्टिसँग फिल्ममा काम गर्न आतुर रहेको आशय प्रष्ट हुन्छ ।
अर्को वर्षको चैतसम्मका लागि प्याक भइसकेका सौगात पछिल्लो समय बक्स अफिसमा विक्न छाडेका अभिनेतामा दरिने अवस्थामा छन् । उनका पछिल्ला फिल्मको प्रचार सामाग्री हेर्ने हो भने दर्शकहरु दोधारमा पर्ने अवस्था सिर्जना भएको छ । हप्ता ननाघ्दै उनी अभिनित नयाँ फिल्मका पोष्टर भित्तामा टाँसिन्छन् ।
लगातार फिल्म फ्लप हुँदा सौगातको स्टारडममाथि यतिबेला प्रश्न चिन्ह खडा भएको छ । सौगातले अब आफ्नो करिअर बचाउनका लागि पनि सृष्टिसँग फिल्ममा जोडी बाँध्न आवश्यक देखिन्छ ।
आशा गरौँ( सौगात र सृष्टिले खोजे जस्तै स्क्रिप्ट चाँडै तयार हुनेछ ।
