धरान(सुनसरी),२२ माघ । २०औं रेडबुल बुढासुब्बा गोल्डकप नकआउट फुटबल प्रतियोगिता अन्तर्गत सोमबार (आज) धरानमा सम्पन्न तेस्रो क्वाटरफाइनलमा नेपाल पुलिस क्लबले काकरभिट्टा फुटबल ट्रेनिङ सेन्टरलाई २-० ले पराजित गर्दै सेमिफाइनलमा प्रवेश गरेको छ ।
काकरभिट्टाका बिकास थुलुङले २०औ मिनेटमा अत्माघाती गोल गरेपछि पुलिसले अग्रता लिएको थियो ।
सुमन लामाले खेलको ६३औ मिनेटमा गोल गरेर नेपाल पुलिस क्लबको जितलाई सुनिश्चित पारे ।
गोलकर्ता सुमन लामा म्यान अफ दि म्याच घोषित भए । उनले दश हजार रुपैया प्राप्त गरे ।
पुलिसले संकटासँग माघ २४ गते सेमिफाइनल खेल्ने छ ।
प्रतियोगिता अन्तर्गत भोलीको खेल थ्री स्टार क्लब र सुदूर पश्चिम एघारबीच हुनेछ ।
धरान फुटबल क्लब, सुनसरीको आयोजना र इनर्जी ड्रिंक रेडबुलको मुख्य प्रायोजन रहेको प्रतियोगिताको बिजेताले उपाधिसहित नगद ५ लाख ५५ हजार रुपैयाँ हात पार्नेछ ।
