काठमाडौं ,३ आषाढ । पूर्वराजा ज्ञानेन्द्र शाहले दशका विभिन्न भागमा बाढी र पहिरोले हुन गएको जनधनको क्षतिप्रति दुःख व्यक्त गर्नुभएको छ ।
बिहिबार बिहान एक विज्ञप्ति प्रकाशित गर्दै उहाँले बाढी पहिरोेले ग्रामीण र शहरीभेगका बासिन्दाको उठीबास भएको सुन्दा र देख्दा आफूहरुलाई दुःख लागेको बताउनुभएको हो ।
उहाँले प्राकृतिक विपत्तिप्रति गहिरो चिन्ता र चासो व्यक्त गर्दै भन्नुभएको छ , “देश कोभिड महामारीबाट आक्रान्त भईरहेको समयमा फेरि बाढी पहिरो नदी कटान जस्ता प्राकृतिक विपत्ति हामीकहाँ आईपरेको छ ।हिमाल पहाड र तराईका धेरै जिल्लाहरुमा कतिपय जन धन र भौतिक निर्माणमा क्षति भएको एवं ग्रामीण तथा शहरी बासिन्दाहरुको उठिबास भएकोखबर सुन्दा, देख्दा हामीलाई दुखित तुल्याएको छ ।”
उहाँले मनसुन प्रारभ्भ भएको यो समयमा नै यति धेरै क्षति हुन पुगेकोमा दुःख व्यक्त गर्दै तीव्र बर्षा हुने बाँकी समयमा के हुने हो भन्ने चिन्ता पनि व्यक्त गर्नुभएको छ ।
पूर्वराजाले यस्तो बेलामा सबैजना मिलेर महामारी र प्राकृतिक बिपत्तिको न्युनीकरण गर्नेतर्फ जिम्मेवार बन्नुपर्ने बताउनुभएको छ ।
उहाँले भन्नुभएको छ, “प्राकृतिक विपत्ति सबैको चिन्ताको विषय भएकोले पूर्वसावधानि राख्ने, तयारी गर्ने ,सजकता अपनाउने र उद्दार एवं राहतकारी ब्यवस्था मिलाउने बिषयमा सबै पक्षको ध्यान जानुपर्ने देखिन्छ ।”
पूर्वराजाले अवस्था विकराल नहोस,अपार क्षति नहोस र जनकल्याणकारी प्रबन्ध प्रभावकारी होस आग्रह पनि गर्नुभएको छ ।
