काठमाडौं, १४ फागुन । दयाहाङ राई र श्वेता खड्काको फिल्म कान्छी देशभर प्रदर्शन भैरहेको छ । यो फिल्मले दर्शकलाई तानिरहेकै बेला चैत्रको पहिलो साता फेरी दयाहाङको अर्को फिल्म रिलिज हुँदछ । यसमा उनको को-स्टार छन्, चर्चित अभिनेत्री प्रियंका कार्की ।
बलिउड फिल्म ‘पद्मावत’ का कारण माघ १२ गतेबाट रिलिज डेट स्थतिग भएको अभिनेता दयाहाङ राई र अभिनेत्री प्रियंका कार्कीको फिल्म ‘ह्याप्पी डेज’ को निर्धारित प्रदर्शन मितिलाई टाइगर श्राफको बागीले अगाडि तानिदिएको हो ।
माघ १२ गतेबाट चैत १६ गतेलाई प्रदर्शन मिति तय गरिएको यो फिल्म अब दुई साता अगाडि अर्थात्, चैत २ गते नै प्रदर्शनमा आउने भएको छ ।
चैत १६ गते बलिउड स्टार टाइगर श्राफ अभिनित फिल्म ‘बागी २’ रिलिज हुदैछ । यसैले ह्याप्पी डेज्का निर्माताहरुले आफ्नो फिल्मको रिलिज डेट अगाडि सारेका हुन् ।
नयाँ प्रदर्शन मिति घोषणा सँगै निर्माण पक्षले कभर भिडियो प्रतियोगिता पनि आब्हान गरेको छ ।
जसमा सहभागी हुन इच्छुकले फिल्ममा समावेश ‘चेप्टे चेप्टे’ गीतमा कभर भिडियो बनाउनु पर्ने छ ।
कभर भिडियो जुनसुकै युट्युब च्यानलबाट अपलोड गरिए पनि त्यसको लिंक ‘हयाप्पी डेज’ को अफिसियल फेसबुक पेजमा पठाउनु पर्नेछ ।
युट्युबमा सर्वाधिक भ्युज पाउने भिडियोलाई निर्माण पक्षले विजेता घोषणा गरि १ लाख नगद पुरस्कार प्रदान गर्ने छ ।
कभर भिडियो प्रतियोगिताको अन्तिम समय फागुन मसान्तसम्म छ ।
सञ्जय गुप्ता, दीया पुन, विक्की जोशी, शिशिर राणा, रुपा पुन, रिकेश चाम्स, जेन बकल लगायतका कलाकारहरुको पनि अभिनय रहेको फिल्मलाई रामकुमार केसीले छायांकन गरेका हुन् ।
मिलन चाम्स निर्देशित रोमान्टिक ड्रामा मिश्रित ‘ह्याप्पी डेज’ लन्डन सिने आइ र चाम्स इन्टरटेनमेन्टको ब्यानरमा निर्माण गरिएको हो ।
फिल्ममा पैसा कमाउन बेलायत पुगेको एक नेपाली युवकको वैधानिक बसोबासका लागि भएको संघर्षको कथा समेटिएको छ ।
वीपी खनाल, भवानी शर्मा, हिरालाल जोशी र मिलन चाम्स निर्माता रहेको यो फिल्मको छायांकन बेलायतका अलावा नेपाल, वेल्स, इङ्ल्याड, स्कटल्यान्डमा गरिएको छ ।
