वुलावायो,हरारे(जिम्बावे), २६ फागुन । आईसीसी विश्व कप छनौट खेलका लागि जिम्बाबेको राजधानी हरारेको बुलावायो एथलेट्स क्लबको खेल मैदानमा भएको नेपाल र अफगानिस्तान बीचको खेलमा नेपालले अफगानिस्तान सामु १ सय ९५ रनको लक्ष्य प्रस्तुत गरेको छ ।
नेपालले निर्धारित ५० ओभरमा सबै विकेट गुमाउदै सो लक्ष्य प्रस्तुत गरेको हो ।
नेपालको तर्फबाट सर्वाधिक रन पारस खड्काले बनाए । उनले १० चौका र १ छक्काको मद्तले ७५ रन जोडे । दीपेन्द्रनाथ ऐरीले ३२ रन जोडे भने आसिफ सेख र ज्ञानेन्द्रमल्लले समान २३ रन जोडे । नेपालका अरु ब्याट्स्म्यान फिका देखिए ।
सोमपाल कामी र बसन्त रेग्मी ९ रनमा आउट भए भने एके शाहले ७ रन मात्र जोडे । करण केसीले ६ रन भन्दा जोेड्न सकेनन् ।
आरके पौडेलले जम्मा १ रन जोडे भने सन्दी लामिछाने र एलएन राजवंशी दुवै कुनै रन लिन नसकी पेभिलियन फर्किए ।
अफगानिस्तानका तर्फबाट रसिद खानले ३ विकेट लिए । उनले एलएन राजवंशी, दीपेन्द्रनाथ ऐरी र ज्ञानेन्द्र मल्ललाई पेभिलियन फर्काए ।
त्यस्तै मोहम्मद नवीले कप्तान पारस, आर के पौडेल र आसिफ शेखको विकेट लिए ।
सपुर जर्दारीले सन्दी लामिछाने र करण केसीलाई मैदानबाट विदा दिए ।
मुजिवर रहमानले एके शाहलाई पनि छिटै पेभिलियन फर्काए ।
आजको खेलमा नेपालले टस जितेर ब्याटिड. रोजेको थियो ।
