किएभ(युक्रेन), २० फागुन(बीबीस) । रुसका राष्ट्रपति भ्लादिमिर पुटिनले युक्रेनमा सैन्य अतिक्रमणको बचाउ गर्दै योजनाअनुसार अगाडि बढिरहेको बताउनुभएको छ।
रुस र युक्रेनका नागरिक एउटै भएको तर्क गर्दै उहाँले पश्चिमाहरूले युक्रेनलाई रुसविरोधी बनाउने प्रयास गरेको आरोप समेत लगाउनुभएको छ।
यसअघि युक्रेनका राष्ट्रपति भोलोदिमिर जेलेन्स्कीले पुटिनलाई एक्लाएक्लै वार्तामा बस्न आह्वान गर्नुभएको थियो।
मानवीय सङ्कट गहिरिँदै गर्दा जेलेन्स्कीले संवादले मात्रै युद्ध अन्त्य गराउन सक्ने बताउनुभएको छ।
वार्तामा के भयो ?
यसैबीच, युद्धविरामसम्बन्धी वार्तामा युक्रेनी र रुसी वार्ताकारहरूले न्यून प्रगति हासिल गरेका छन्।
सर्वसाधारणका निम्ति सुरक्षित निकासको आवश्यकतामा दुवै पक्ष सहमत भएका छन्।
त्यो नतिजा निस्के पनि किएभले अपेक्षा गरेअनुरूप परिणाम आउन नसकेको युक्रेनका एक वरिष्ठ अधिकारीले बताउनुभएको छ।
पुटिनले युक्रेनमाथि गरिएको अतिक्रमणलाई सही ठहर्याएकै बेला वार्ताको नतिजाबारे विवरण सार्वजनिक भएको हो।
अज्ञात स्थलमा भएको वार्तामा रुसी र युक्रेनी प्रतिनिधिहरू सम्भावित युद्धविरामबारे सहमत भएका छन्।
तर मानिसहरूलाई सुरक्षित ठाउँमा जान मार्ग तय भएपछि र उद्धारको समयसम्मका लागि युद्धविराम हुनसक्ने युक्रेनी राष्ट्रपतिका सहयोगी मिखाइलो पोदोलियाकले बताउनुभयो।
“धेरै दुःखका साथ भन्नुपर्दा वार्ताबाट हामीले अपेक्षित नतिजा पाएनौँ “, उहाँले थप्नुभयो।
जारी द्वन्द्वबीच रुस र युक्रेनले एक साताभित्र दोस्रो पटक वार्ता गरेका छन्।
तर युक्रेनी शहरहरूमाथि रुसको भीषण बमबारीबीच मानवीय सङ्कट गहिरिँदै गएको छ।
रुसी राष्ट्रपति पुटिनले आफ्ना फ्रेन्च समकक्षी एमानुएल माक्रोँसँग ९० मिनेट लामो टेलिफोन वार्ता गर्नुभएको छ।
रुसी फौजले गैरसैनिक संरचनाहरूलाई समेत निसाना बनाउँदै आएको युक्रेनी अधिकारीहरूले बताउने गरे पनि मस्कोले त्यसलाई अस्वीकार गर्दै आएको छ।
माक्रोँका एक सहयोगीले संवाददाताहरूलाई बताएअनुसार नराम्रा दिन अझै आउने राष्ट्रपतिको अनुमान छ।
त्यसको कारण के हो भने टेलिफोन वार्तामा रुसी राष्ट्रपति पुटिनले युक्रेनमा आफ्ना लक्ष्य हासिल नभएसम्म आक्रमण जारी राख्ने माक्रोँलाई बताउनुभएको थियो।
जबाफमा माक्रोँले युक्रेनमाथि रुसले गरेको अतिक्रमण एउटा गम्भीर गल्ती भएको र पुटिनका धारणा वास्तविकतासँग मेल खाने खालका नभएको जवाफ दिनुभएको थियो।
मारिउपोलमा ऊर्जा र पानीको आपूर्ति अवरुद्ध
लडाइँ जारी रहँदा रणनीतिक महत्त्वको युक्रेनको दक्षिणी बन्दरगाह शहर मारिउपोलका अधिकारीहरूले रुसी फौजको भीषण गोलाबारीका कारण ऊर्जा र पानीको आपूर्ति रोकिएको बताएका छन्।
मानवीय सङ्कटबारे चेतावनी दिँदै सो शहरका डेपुटी मेयरले शवहरू उठाउन सुरक्षित नरहेको बताउनुभयो।
एउटा रुसी लडाकु विमानले उत्तर शहर चर्निभमा आवासीय क्षेत्रमाथि हवाई हमला गर्दा कम्तीमा २२ जना मारिएको आपत्कालीन सेवासम्बन्धी निकायले जनाएको छ।
राजधानी किएभदखि ६० किलोमिटर टाढा रहेको पश्चिमोत्तर शहर बोरोडियान्कामा भवनहरू ध्वस्त भएको भिडिओ फुटेजमा देखिन्छ।
