बर्लिन(जर्मनी(, ११ चैत्र (बीबीसी) ।क्याटलोनियाका पूर्व नेता कारलस पूज्डमोनलाई जर्मनीमा हिरासतमा लिइएको उनका वकिलले बताएका छन्।
बेल्जियमतर्फ जाने क्रममा डेनमार्कको सीमा पार गरेपछि उनलाई हिरासतमा लिइएको उनका वकिलले सामाजिक सञ्जाल ट्वीटरमा एक सन्देश राख्दै जनाएका छन्।
राज्यद्रोह गरेको आरोपमा स्पेनमा पूज्डमोन खोजीको सूचीमा छन्।
स्वनिर्वासन
गत वर्षको अक्टोबरमा स्पेनबाट क्याटलोनिया अलग हुने पक्षमा जनमतसंग्रह गराएयता उनी बेल्जियमा स्वनिर्वासनमा छन्।
उक्त जनमत संग्रहमा स्पेनले प्रतिबन्ध लगाएको थियो।
उनका विरुद्ध हालैमात्र युरोपेली पक्राउ पुर्जी पुनः सक्रिय गरिएको थियो।
जनमतसंग्रहपछि मड्रिडस्थित केन्द्रीय सरकारले क्याटलान क्षेत्रीय संसद्लाई बर्खास्त गरिदिएको थियो र प्रत्यक्ष शासन लागू गरेको थियो।
साथै त्यहाँ नयाँ चुनाव गराइएको थियो तर स्वतन्त्रता-पक्षधर दलहरूले झिनो अन्तरले जितेका थिए।
तनाव
क्याटलोनियाको नयाँ प्रमुखका लागि चयन गरिएका उम्मेदवार पक्राउ परेपछि नयाँ प्रमुख चुन्ने योजनालाई पृथकतावादी नेताहहरुले त्यागिदिएका छन्।
यस्तो अवस्थासँगै त्यहाँ तनाव जारी रहेको छ।
शुक्रबार जोर्डी टुरुल्यासहित अन्य पाँच जना पृथकतावादी नेताहरू पक्राउ परेका थिए।
उनीहरूको हिरासतको विरोधमा बार्सिलोनामा प्रदर्शनहरू हुनुका साथै प्रहरीसँग झडपहरू भएका थिए।
