काठमाडौं, ११ पौष । नयाँ सरकारको गठनसँगै नेपालको शेयर बजार उकालो मार्ग समातेको छ ।

अर्थमन्त्रीमा विष्णु पौडेलको नाम आएसंगै शेयर लगानीकर्तामा उत्साह देखिएको हो । पौडेल अर्थमन्त्री रहदा शेयर बजारमा सबैभन्दा माथिल्लो विन्दुमा पुगेर कीर्तिमान कायम गर्ने गरेको छ ।

पछिल्लो समय निरन्तर रुपमा उतारचढाव भइरहेको धितोपत्र परिसूचक सोमवार एकाएक ५६.८६ अङ्क बढेर १९२४.०७ बिन्दुमा पुगेको छ ।

सोमबार २ सय ५० कम्पनीको ५६ लाख ५३ हजार कित्ता शेयरको किनबेचबाट २ अर्ब ९ करोड ७० लाख रुपियाँ बराबरको कारोबार भएको छ ।

यस दिन कारोबार रकममा पनि सुधार भएको छ । नेप्सेका १३ उपसमूहमध्ये अन्य उपसमूहको परिसूचक बाहेक सबै उपसमूहको परिसूचक बढेको छ । जसमध्ये फाइनान्स उपसमूहको परिसूचक ६.५२ प्रतिशत बढेको छ ।

त्यसैगरी, जलविद्युत् उपसमूहको परिसूचक ५ प्रतिशतभन्दा बढी बढेको छ भने विकास बैंक र लगानी उपसमूहको परिसूचक ४ प्रतिशतभन्दा बढी बढेको छ ।

अन्य उपसमूहको परिसूचक भने २.२९ प्रतिशत घटेको छ ।

यस दिन आधा दर्जनभन्दा बढी कम्पनीको शेयर सकारात्मक सर्किट लेभलमा कारोबार भएको छ । जसमा गोर्खाज फाइनान्स, सृजनशील लघुवित्त, रिलायन्स फाइनान्स, धौलागिरी लघुवित्त, खप्तड लघुवित्त, हिमालयन पावर वार्टनर र घलेम्दी हाइड्रोको शेयर सकारात्मक सर्किट लेभलमा कारोबार भएको छ । त्यस्तै शिवश्री हाइड्रो,विन्ध्यवासिनी र युनियन हाइड्रोको शेयर कारोबार पनि सर्किट लेभलमा नै बढेको छ ।