काठमाडौं, १४ चैत्र ।अभिनेत्री त्रय प्रियंका कार्की, ऋचा शर्मा र केकी अधिकारीको लिड रोल रहेको फिल्म ‘कोहलपुर एक्सप्रेस’ को ट्रेलर सार्वजनिक भएको छ । बुधवार राजधानीमा आयोजित सार्वजनिक गरिएको ट्रेलरमा कमेडी संवादलाई प्राथमिकता दिइएको छ ।
बैशाख १४ गतेबाट प्रदर्शनमा आउने फिल्मका निर्देशक विशाल भण्डारी हुन् । यसअघि उनले दर्जनौं म्यूजिक भिडियो निर्देशन गरेता पनि फिल्म निर्देशन उनको यो पहिलो हो । केकीको ब्यानर ‘जुनकिरी आर्टस्’ बाट निर्माण भएको फिल्ममा ऋचाले मोडल तिर्सना बुढाथोकीको हाउभाउ नक्कल गर्न खोजेकी छन् ।
तिर्सना बुढाथोकी बन्नुभएको हो ? भन्ने पत्रकारको प्रश्नमा उनले भनिन्, ‘तिर्सना बुढाथोकी बनेको होइन । तर, तीन दिन मैले उहाँको भिडियो चाहीँ हेरेकी थिएँ । धेरथोर उहाँको हाउभाउबाट प्रभावित पात्र चाहीँ हो ।’ उनी फिल्ममा बार गर्लको रुपमा प्रस्तुत भएकी छिन् ।
ट्रेलरमा पैसाका लागि पात्रबीचको तनाब देखाइएको छ । विनोद न्यौपाने, बुद्दी तामाङ, रविन्द्र झा, कुशाग्र भट्टराईलगायतका कलाकारहरुको पनि अभिनय रहेको फिल्मको कथा निर्देशक भण्डारी आफैंले लेखेका हुन् ।
कार्यक्रममा बोल्दै निर्देशक भण्डारीले १ घण्टा ५५ मिनेट दर्शकलाई मनोरञ्जन दिएर हलमै बाँधेर राख्ने ठोकुवा गरे । उता पहिलो पटक निर्मात्री बनेकी केकीले ‘कोहलपुर एक्सप्रेस’ गर्दाको अनुभव सुनाइन् ।
उनले भनिन्, ‘म करीब एक दशकदेखि यही क्षेत्रमा छु । त्यसैले गाह्रो हुँदैन होला जस्तो लागेको थियो । तर निर्मात्री बन्न निकै गाह्रो हुँदो रहेछ । अर्कै ‘फिल्ड’ मा हात हालेको झैँ भयो ।’ कार्यक्रममा प्रियंका र ऋचा दुबै उपस्थित थिए ।
अर्जुन तिवारीको छायांकन रहेको फिल्ममा भद्र बहादुर शाही, देवी लाल न्यौपाने पण्डित र शिव प्रसाद चौलागाई ‘कोहलपुर एक्सप्रेस’ को निर्माताका रुपमा रहेका छन् ।
फिल्मका गीतमा राजनराज सिवाकोटी, अर्जुन पोखरेल र कालीप्रससाद बाँस्कोटाको संगीत सुन्न सकिन्छ । ‘अब मनसँग मन’ र ‘सि-ओे-डब्लु काउ’ गीतका कारण पनि यो फिल्म यतिबेला राम्रै चर्चामा छ ।
