काठमाडौं, १० जेठ । राष्ट्रिय ध्वजाबाहक नेपाल वायुसेवा निगमले छिट्टै अष्ट्रेलियामा आफ्नो उडान सुरु गर्ने भएको छ ।
निगमले केही महिना अगाडिदेखि नियमित उडानको लागि प्रयास गरेकोमा सिड्नी विमानस्थलमा उडानको समय (स्लट) पाएको जनाएको छ।
निगमका अनुसार सिड्नी विमानस्थलले निगमलाई सातामा २ उडानका लागि अनुमति र स्लट दिएको हो। विमानस्थलले बिहीबार र शनिबारका लागि स्लट दिएको छ।
विमानस्थलबाट उडानका लागि अनुमति पाएसँगै निगमले अष्ट्रेलियन नागरिक उड्डयनसँग उडानका लागि अनुमति माग्दै सबै विवरण बुझाएको छ।
निगमले काठमाडौंबाट सिंगापुरमा ट्रान्जिट गर्दै अष्ट्रेलियाको सिड्नी उडान गर्न लागेको हो।
यसका लागि निगमले जिएसए (जनरल सेल्स एजेन्ट) छनोट लगायत प्रक्रिया अगाडी बढाएको छ। यसका साथै जहाजमा सवार गर्न यात्रुलाई खाजा–नास्ताका लागि समेत क्याटरिङ कम्पनी छनोट प्रक्रिया समेत अगाडी बढाएको निगमले बताएको छ।
त्यस्तै, निगमले सिंगापुर र सिड्नीमा इन्धनका लागि पनि कम्पनी छनोटको काम गरिरहेको छ।
सिंगापुर र सिड्नी विमानस्थलको लागि एमआरओ (मेन्टेनन्स, मर्मत र अपरेशन) समेत छनोट गरिसकेको छ।
निगमले वाइडबडीबाट अष्ट्रेलियाको सिड्नी उडानको तयारी गरेको हो। नेपाल वायुसेवा निगमसंग एअरबस कम्पनीका ए ३३० २४३ सेरिजका दुईवटा वाइड बडी विमानहरु रहेका छन् । अन्तर्राीष्ट्रय उडानमा अरु एअरबसकै ए ३२० सेरिजका दुईवटा न्यारो बडीका विमान पनि रहेका छन् ।
