काठमाडौं, १७ जेठ । नेपाल उद्योग वाणिज्य महासङ्घको आयोजनामा काठमाडौँमा मंगलबारदेखि रोजगार मेला सुरु भएको छ । श्रम, रोजगार तथा सामाजिक सुरक्षा मन्त्रालय र अन्तर्राष्ट्रिय श्रम सङ्गठनको सहयोगमा आजदेखि महासङ्घको केन्द्रीय कार्यालय टेकुमा दुईदिने मेला सुरु भएको हो ।
मेलाको उद्घाटन कार्यक्रममा महासङ्घका अध्यक्ष चन्द्रप्रसाद ढकालले रोजगार मेलाले जनशक्ति चाहिने कम्पनी र रोजगारी आवश्यक हुनेका बीचमा पुलको काम गर्ने बताउनुभयो ।
उहाँले रोजगार मेलाले नेपालमा भएका जनशक्ति उद्योग व्यवसायमा उपलब्ध गराउन सहयोग पुग्ने विश्वास व्यक्त गर्नुभयो । पछिल्लो समय वैदेशिक रोजगारीमा जाने युवालाई रोजगार मेलाले रोक्न सक्ने उहाँको भनाइ छ ।
अध्यक्ष ढकालले आगामी आर्थिक वर्षको बजेटलाई कार्यान्वयन गर्नका लागि निजी क्षेत्रको साथ र सहयोग रहेको बताउनुभयो । उहाँले बजेटले स्टार्टअप र सीप विकासका विषयमा बजेटमा समेटेका विषय निजी क्षेत्रले उठाएको बताउनुभयो । मेलामा काठमाडौँ र ललितपुर महानगरपालिका, भक्तपुर नगरपालिका, महासङ्घका सदस्य भक्तपुर र ललितपुर उद्योग वाणिज्य सङ्घको सहकार्य रहेको छ ।
कामको खोजीमा रहेका युवालाई प्रमुख कम्पनीमार्फत कामको अवसर जुटाइदिन पहल गर्ने, नयाँ अवसरको खोजी गर्न सघाउने, आवश्यक सीप पहिचानसहित युवा जनशक्तिलाई स्वदेशमै काम गर्ने वातावरण बनाउने उद्देश्य मेलाले लिएको छ । रोजगार मेलामा सयभन्दा बढी कम्पनीको सहभागिता रहेको छ । महासङ्घले मेलामा कामको खोजीमा रहेका पाँच हजारभन्दा बढी युवालाई अवलोकन गराउने लक्ष्य लिएको छ ।
मेला बुधवारसम्म चल्नेछ ।
