काठमाडौं, १८ माघ । काठमाडौंस्थित बाँसबारी छालाजुत्ता उद्योगको १० रोपनी जग्गा प्रकरणमा प्रहरीले व्यवसायी अरुण चौधरी र तात्कालीन अध्यक्ष अजितनारायण थापा पक्राउ पर्नुभएको छ ।
नेपाल प्रहरीको केन्द्रीय अनुसन्धान ब्युरो (सीआईबी)ले उहाँहरुलाई निवासबाटै पक्राउ गरेको हो।
सीआईबी प्रमुख एआईजी किरण बज्राचार्यका अनुसार चौधरीलाई उहाँको लाजिम्पाटस्थित निवासबाट र अजितनारायण थापालाई बत्तिसपुतलीस्थित निवासबाट पक्राउ गरेको हो। प्रहरीले पहिले अरुणलाई पक्राउ गरेपछि थापालाई हिरासतमा लिएको हो।
उद्योगी अरुण चौधरी सीजी होल्डिङ्सका चेयर म्यान हुनुहुन्छ । थापा तात्कालीन बाँसबारी छालाजुत्ता कारखानाका सञ्चालक समितिका अध्यक्ष हुनुहुन्थ्यो।
बाँसबारी छालाजुत्ता उद्योगको सरकारी जग्गा हिनामिना प्रकरणमा सीआईबीले अनुसन्धान गरिरहेको छ। यस प्रकरणबारे अख्तियार दुरुपयोग अनुसन्धान आयोगमा पनि उजुरी परेको छ।
