माले(माल्द्धिप),२ साउन । नेपाली लिग च्याम्पियन टिप टप हेल्प नेपाल स्पोर्टस क्लबका खेलाडीहरु टापु राष्ट्र माल्द्धिपमा भईरहेको काभा मेन्स च्याम्पियन्स लिगमा चम्किएका छन् । नेपालको क्लब च्याम्पियन हेल्प नेपाल स्पोर्टस् क्लबले शुक्रवार राति भएको दोस्रो खेल पनि जितेको छ । नेपालले आयोजक माल्द्धिपको एचडीसी क्लबलाई ३ -१ को सेटमा पराजित गरेको छ ।
शुक्रवार राति भएको खेलमा नेपालले पहिलो र दोस्रो सेट लगातार जित्यो । तेस्रो सेट आयोजक माल्द्धिपको एचडीसी क्लबले जित्यो । चौथो सेटलाई आफ्नो पक्षमा पार्दै नेपालले दोस्रो खेललाई चार सेटमा टुंग्यायो ।
पहिलो खेलमा नेपालले माल्द्धिपलाई २५ -१९ ले हरायो । दोस्रो खेललाई पनि २५- २३मा नेपालले जित्यो । तेस्रो खेलमा माल्द्धिपले पुनरागमन गर्दै २५ -१९ ले नेपाललाई पराजित गर्यो । चौथो सेटमा पुगेको खेललाई नेपालले २५ -२२ ले आफ्नो पक्षमा ल्याएर खेल टुंग्यायो ।
माल्दिभ्समा बिहिवार सुरु भएको च्याम्पियन्स लिगको आफ्नो पहिलो खेलमा हेल्प नेपालले घरेलु टोली धिवेही सिफाइन्स क्लबलाई ३ -२ ले हराएको थियो ।
सेन्ट्रल एसियन भलिबल एसोसियन (काभा) को आयोजना भइरहेको च्याम्पियन्स लिगमा काभाका सदस्य रहेका ५ देशका लिग च्याम्पियन क्लब र आयोजकको उपविजेता समेत गरि ६ टोलीको सहभागिता रहेको छ ।
प्रतियोगिता सिंगल राउण्ड रोबिनका आधारमा भईरहेको छ ।
अब नेपालले शनिवार किर्गिस्तानको ब्रिस्बिेक क्लब र सोमबार श्रीलंकासंग खेल्ने छ ।
जुलाई २३ मा अंकतालिकामा पाँचौ र छैठौ स्थानमा रहने टोलीको बीचमा, तेस्रो र चौथोको स्थानमा रहने टोलीको बीचमा र पहिलो र दोस्रो स्थानमा रहने टोलीको बीचमा खेल हुने तालिका छ ।
च्याम्पियन्स लिगको विजेताले सन् २०२६ को एसियन क्लब च्याम्पियनसिप खेल्न पाउनेछ।
