क्वाललम्पुर(मलेशिया), १६ भदौ । एशिया कप छनोट प्रतियोगितामा तेस्रो खेलमा नेपालले पहिलो जित निकालेको छ ।
मलेसियाको बायुमास ओभल मैदानमा आज भएको खेलमा नेपालले घरेलु टिमलाई १९ रनले हरायो ।
टस हारेर ब्याटिङको निम्तो पाएको नेपालले बर्षा कारण ३० ओभरमा झारीएको खेलमा ७ विकेट गुमाउँदै १ सय ८८ रन बनायो । सुरुवात राम्रो गर्न नसकेको नेपालको स्कोर १८ रन हुँदा ओपनर सुवास खकुरेल ९ रनमा आउट भए । त्यसपछि ३८ रन बनाउदा नेपालले अर्को विकेट खेर फाल्यो । ज्ञानेन्द्र मल्ल ११ रनमा पेभेलियन फर्किए । कप्तान पारस खड्का १३ रनमा आउट हुँदा नेपालको स्कोर मात्र ५६ रन थियो । तर त्यसपछि अरु ४ रन स्कोर बोर्डमा थप्दा २ विकेट गुमायो । अनिल शा १६ रनमा आउट भए भने सागर पुनले खाता खोल्न सकेनन ।
तर त्यसपछि दिपेन्द्र ऐरी र आरिफ शखेले छैटौ विकेटका लागि १ सय १ रनको साझेदारी गर्दै टिमलाई बलियो स्थितीमा पुर्याए । दिपेन्द्रले ५४ रन बनाए । तर नेपालको स्कोर १ सय ६१ रन हुदा लगातार दुई विकेट झर्यो ।
दिपेन्द्र आउट भएको लगत्तै सोमपाल कामी पनि पेभेलियन फर्किए । तर आरिफ शेखले नेपालका लागि उत्कृष्ट ब्याटिङ गरे । उनले अविजीत ६४ रन बनाए । यो क्रममा उनले ५ चौका र दुई छक्का प्रहार गरे ।
जवाफमा मलेसियाले ३० ओभरमा ९ विकेट गुमाउदा १ सय ६९ रन मात्र बनाउन सक्यो । आक्रामक सुरुवात गरेको मलेसियाले २६ रनमा पहिलो विकेट गुमायो । नेपाली बलरमाथि हावी हुन खोजेको मलेसियाले ६६ रनमा दोस्रो विकेट गुमायो । उसका अहमद फैज नुर २२ रनमा आउट भए । त्यसपछि मोहम्मद अनवर अरुदिन ३४ रनमा आउट भएपछि मलेसियाले ८२ रनमा तेस्रो विकेट गुमायो । त्यसपछि मलेसियाले १ सय १४ रन बनाउदा बसन्तले भिरन्दिप सिंहलाई आउट गरे । जसका कारण मलेसियाले चौथो विकेट गुमायो । प्रतिस्पर्धात्मक लक्ष्य दिएको नेपाली बलरसामु मलेसियन खेलाडी कुनै समय पनि दबावमा आएनन् ।
तर १ सय ३१ रन बनाउदा दिपेन्द्र ऐरीले सेइद अजिज मुबारकलाई ३४ रनमा आउट गरेपछि उसले ५ विकेट गुमायो । एक समय सहजै जित निकाल्छ भन्ने अवस्थामा पुगेको मलेसियाले १ सय ५१ रनमा छैटौ विकेट गुमायो ।
२७ औं ओभरमा सन्दिपले दुई विकेट लिएपछि मलेसिया दबावमा आयो । उसका मुहमद राम्ली १६ रनमा आउट भने इद्रुसले खाता खोल्न पाएनन् ।
तर पुछारका खेलाडी एकपछि अर्को रुपमा आउट भएपछि नेपालले पहिलो जित दर्ता गर्यो । बलिङ तर्फ नेपालका बसन्त रेग्मीले तीन र सन्दिप लामिछाने तथा सोमपाल कामीले समान दुई दुई लिए । सागर पुन र दीपेन्द्र सिं ऐरीले समान एक एक विकेट लिए ।
