कीर्तिपुर(काठमाडौं), ६ पौष । पहिलो संस्करणको सिद्धार्थ बैंक नेपाल प्रिमियर लिग(एनपीएल)को फाइनल खेलमा सुदूरपश्चिम रोयल्सले जनकपुर बोल्ट्ससमक्ष १ सय ८५ को बलियो लक्ष्य प्रस्तुत गरेको छ ।
कीर्तिपुरस्थित त्रिभुवन विश्वविद्यालय क्रिकेट मैदानमा भैरहेको फाइनल खेलमा टस जितेर पहिले ब्याटिङ गरेको सुदूरपश्चिमले निर्धारित २० ओभरमा ९ विकेट गुमाएर १ सय ८४ रनको बलियो योगफल तयार गरेको छ ।
सुदूरपश्चिमका लागि सेफ अलि जेबले सर्वाधिक ६९ रन जोडे । उनले ४३ बलमा ८ चौका र २ छक्का प्रहार गरे । लिगमा जेबले दोस्रो अर्धशतक ३३ बलमा पूरा गरे । खेलमा विनोद भण्डारीले ३१ बलमा १ चौका र ३ छक्काको सहयोगमा ४१ रन जोडे । हर्मित सिंह र ब्रेण्डन मक्मुलनले समान १४ । १४ रन बनाउँदै जेम्स निशमको बलमा बोल्ड आउट भए । कप्तान दीपेन्द्रसिंह ऐरी ९, स्कट कुग्गेलेइन र नरेश बुढाऐरले ८ । ८ रन, इशान पाण्डले ६, तथा आरिफ शेख र नरेन्द्र साउदले १ । १ तथा को योगदान दिए ।
सुदूरपश्चिमलाई रोक्ने क्रममा जनकपुरका लागि किशोर महतो र मोहम्मद मोहसिनले समान ३। ३ तथा ललितनारायण राजवंशी र जेम्स निशमले समान १ ।१ विकेट लिए ।
यस संस्करणमा लिग चरण र पहिलो क्वालिफायरमा जनकपुर र सुदूरपश्चिमले एक अर्काको सामना गरेका थिए । दुवै भेटमा सुदूरपश्चिमले जनकपुरमाथि सहज जित हात पारेको थियो । लिग चरणको १८औं खेलमा सुदूरपश्चिम र जनकपुर आमनेसामने भएका थिए । लिग चरणको खेलमा सुदूरपश्चिमले जनकपुरलाई ७२ रनको फराकिलो हार बेहोरेको थियो ।
सुदूरपश्चिमले दिएको १ सय २४ रनको लक्ष्य पछ्याउने क्रममा जनकपुर ५१ रनको झिनो स्कोरमा समेटिएको थियो । लिग चरणमा शीर्ष दुईमा रहेका यि दुवैले पहिलो क्वालिफायर खेलेका थिए ।
बुधवारको पहिलो क्वालिफायरमा यि आमनेसामने भएका थिए । पहिलो क्वालिफायरमा पनि जनकपुरमाथि हाबी सुदूरपश्चिमले ८ विकेटको फराकिलो जित हात पारेको थियो ।
पहिलो क्वालिफायर जित्दै सुदूरपश्चिमले सिधै फाइनल यात्रा तय गरेको थियो । जनकपुर भने दोस्रो क्वालिफायरको बाटो हुँदै फाइनलसम्म पुगेको हो । दोस्रो क्वालिफायरमा जनकपुरले इलिमिनेटको विजेता कर्णाली याक्समाथि २ विकेटको जित हात पारेको थियो ।
पहिलो संस्करणको सिद्धार्थ बैंक नेपाल प्रिमियर लिगको विजेता टिमले आकर्षक ट्रफी सहित १ करोड १० लाख रुपैयाँ पाउँने छ । दोस्रो टोलीले ५१ लाख रुपैयाँ प्राप्त गर्नेछ । तेस्रो कर्णाली याक्सले २५ लाख र चौथो चितवन राइनोजले १५ लाख रुपैयाँ प्राप्त गर्नेछ ।
