कीर्तिपुर(काठमाडौं), ६ पौष । पहिलो संस्करणको सिद्धार्थ बैंक नेपाल प्रिमियर लिग(एनपीएल) को उपाधि जनकपुर बोल्ट्सले जितेको छ ।आज भएको फाइनल खेलमा सुदूरपश्चिम रोयल्सलाई पाँच विकेटले पराजित गर्दै उसले उपाधि जितेको हो ।
यो जितसँगै यस बर्षको च्याम्पियन जनकपुरले ट्रफी सहित नगद रु १ करोड १० लाख प्राप्त गरेको छ । फाइनलमा उपविजेता बनेको सुदूरपश्चिमले नगद रु ५१ लाख प्राप्त गरेको छ ।
आजको रोचक र प्रतिस्पर्धात्मक फाइनल खेलमा सुदूरपश्चिमले दिएको १ सय ८५ रनको लक्ष्य जनकपुरले १९.२ ओभरमा ५ विकेटको क्षतिमा पूरा गर्यो । सुदूरपश्चिमका लागि लाहिरु मिलन्थाले सर्वाधिक ८७ रन जोडे । उनले ४९ बलमा ९ चौका र ४ छक्का प्रहार गरेका थिए । लिगको दोस्रो अर्धशतक उने ३१ बलमा पूरा गरे ।
खेलमा आसिफ शेखले १९ बलमा ४ चौका र २ छक्काको सहयोगमा ३३ रन जोडे । जनकपुरका लागि हर्ष ठाकरले २४ रन, मोहम्मद मोहसिन ९ रन, जेम्स निसमले ४ रन, आकाश त्रिपाठी र मयन यादवले २ । २ रनको योगदान दिए ।
यस अगाडि कीर्तिपुरस्थित त्रिभुवन विश्वविद्यालय क्रिकेट मैदानमा सुरु भएको फाइनल खेलमा टस जितेर पहिले ब्याटिङ गरेको सुदूरपश्चिमले निर्धारित २० ओभरमा ९ विकेट गुमाएर १ सय ८४ रनको बलियो योगफल तयार गरेको थियो ।
सुदूरपश्चिमका लागि सेफ अलि जेबले सर्वाधिक ६९ रन जोडे । उनले ४३ बलमा ८ चौका र २ छक्का प्रहार गरे । लिगमा जेबले दोस्रो अर्धशतक ३३ बलमा पूरा गरे । खेलमा विनोद भण्डारीले ३१ बलमा १ चौका र ३ छक्काको सहयोगमा ४१ रन जोडे । हर्मित सिंह र ब्रेण्डन मक्मुलनले समान १४ । १४ रन बनाउँदै जेम्स निशमको बलमा बोल्ड आउट भए । कप्तान दीपेन्द्रसिंह ऐरी ९, स्कट कुग्गेलेइन र नरेश बुढाऐरले ८ । ८ रन, इशान पाण्डले ६, तथा आरिफ शेख र नरेन्द्र साउदले १ । १ तथा को योगदान दिए ।
सुदूरपश्चिमलाई रोक्ने क्रममा जनकपुरका लागि किशोर महतो र मोहम्मद मोहसिनले समान ३। ३ तथा ललितनारायण राजवंशी र जेम्स निशमले समान १ ।१ विकेट लिए ।
यस संस्करणमा लिग चरण र पहिलो क्वालिफायरमा जनकपुर र सुदूरपश्चिमले एक अर्काको सामना गरेका थिए । दुवै भेटमा सुदूरपश्चिमले जनकपुरमाथि सहज जित हात पारेको थियो । लिग चरणको १८औं खेलमा सुदूरपश्चिम र जनकपुर आमनेसामने भएका थिए । लिग चरणको खेलमा सुदूरपश्चिमले जनकपुरलाई ७२ रनको फराकिलो हार बेहोरेको थियो ।
सुदूरपश्चिमले दिएको १ सय २४ रनको लक्ष्य पछ्याउने क्रममा जनकपुर ५१ रनको झिनो स्कोरमा समेटिएको थियो । लिग चरणमा शीर्ष दुईमा रहेका यि दुवैले पहिलो क्वालिफायर खेलेका थिए ।
बुधवारको पहिलो क्वालिफायरमा यि आमनेसामने भएका थिए । पहिलो क्वालिफायरमा पनि जनकपुरमाथि हाबी सुदूरपश्चिमले ८ विकेटको फराकिलो जित हात पारेको थियो ।
पहिलो क्वालिफायर जित्दै सुदूरपश्चिमले सिधै फाइनल यात्रा तय गरेको थियो । जनकपुर भने दोस्रो क्वालिफायरको बाटो हुँदै फाइनलसम्म पुगेको हो । दोस्रो क्वालिफायरमा जनकपुरले इलिमिनेटको विजेता कर्णाली याक्समाथि २ विकेटको जित हात पारेको थियो ।
नेपालको पहिलो राष्ट्रिय लिग मानिएको सिद्धार्थ बैंक नेपाल प्रिमियर लिगमा तेस्रो भएको कर्णाली याक्सले २५ लाख र चौथो स्थान हासिल गरेको चितवन राइनोजले १५ लाख रुपैयाँ प्राप्त गरेका छन् ।
