लस एन्जलिस(संयुक्त राज्य अमेरिका), १९ फागुन । ९७ औं ओस्कार अवार्ड समारोहमा २३ विधामा ओस्कार विजेताहरूको घोषणा गरिएको छ। अमेरिकाको लस एन्जलसमा आयोजित ओस्कार अवार्ड समारोहमा फिल्म अनोरा धेरै विधामा पुरस्कार जित्ने फिल्म बन्यो ।
यौनकर्मीको कथामा आधारित फिल्म अनोराले उत्कृष्ट चलचित्रको अवार्ड सहित पाँच विधामा ओस्कार अवार्ड जितेको छ। फिल्मकी अभिनेत्री मिकी म्याडिसनले उत्कृष्ट अभिनेत्रीको अवार्ड प्राप्त गरेकी छिन्।
यस फिल्मका लागि शन बेकरले उत्कृष्ट निर्देशकको पुरस्कार पाए । यो फिल्मले उत्कृष्ट सम्पादनको अवार्ड पनि पाएको छ।
शन बेकरद्वारा निर्देशित रोमान्टिक कमेडी अनोरा एक धनी व्यापारीसँग विवाह गर्ने यौनकर्मीमा आधारित छ। यो फिल्मले कान्स फिल्म फेस्टिभलमा पाल्मे डीुओर अवार्ड जितेको थियो। २१ मे २०२४ मा रिलिज भएको यो फिल्म ६ मिलियन डलरमा बनेको थियो, जसले ४१ मिलियन डलर कमाएको थियो।
यस वर्षको ओस्कार अवार्डमा द ब्रुटालिस्टमा अभिनयका लागि एड्रियन ब्रोडीले उत्कृष्ट अभिनेताको अवार्ड जिते। द ब्रुटालिस्टले उत्कृष्ट छायांकनको लागि ओस्कर अवार्ड जितेको छ। यो पुरस्कार बेलायतका लोल क्राउलीले प्राप्त गरे। यो फिल्मले उत्कृष्ट मौलिक स्कोरको लागि पनि ओस्कर अवार्ड जितेको छ।
पिरियड ड्रामा फिल्म द ब्रुटालिस्टले ३ वटा गोल्डेन ग्लोब अवार्ड पनि जितिसकेको छ। यो फिल्मले एक हंगेरी मानिसको कथा भन्छ जो भागेर संयुक्त राज्य अमेरिका जान्छ र आफ्नो सपना पूरा गर्न संघर्ष गर्छ।
यसैबीच, ब्राजिलियन फिल्म आई एम स्टिल हियरले सर्वश्रेष्ठ अन्तर्राष्ट्रिय फिचर अवार्ड जित्यो। यो फिल्म ब्राजिलका राजनीतिज्ञ रुबेन्स पाइभाको वास्तविक बेपत्ता भएको घटनामा आधारित छ। यस फिल्मको अवार्ड घोषणा हुँदा ठूलो ताली बजेको थियो।
यस समारोहमा ड्युनः पार्ट टु ले दुई ओस्कर पुरस्कार प्राप्त गरेको छ। यसले पहिले सर्वश्रेष्ठ ध्वनि श्रेणीमा ओस्कर जित्यो र त्यसपछि सर्वश्रेष्ठ भिजुअल इफेक्ट पुरस्कार जित्यो।
ड्युनः पार्ट टु फ्र्याङ्क हर्बर्टको उपन्यास ड्युनमा आधारित चलचित्र हो। यो फिल्मले पहिले नै धेरै प्रशंसा बटुलिसकेको छ।
