प्रधानमन्त्री एकदिवसीय राष्ट्रिय क्रिकेट प्रतियोगिता २०२५ः कोशी प्रदेशद्धारा ९ विकेटले गण्डकी पराजित

भैरहवा(रुपन्देही), ३ चैत्र । प्रधानमन्त्री (पिएम) एकदिवसीय राष्ट्रिय क्रिकेट प्रतियोगिता २०२५ अन्तरगत आज भएको खेलमा कोशी प्रदेशले गण्डकीलाई ९ विकेटले पराजित गरेको छ ।
जारी पिएम कपमा पहिलो जित निकाल्ने क्रममा कोशी प्रदेशले गण्डकीलाई ९ विकेटले पराजित गरेको हो ।
५० ओभरको खेलमा गण्डकीले दिएको ३२ रनको झिनो लक्ष्य कोशीले ८.२ ओभरमा १ विकेट गुमाएर पूरा गर्यो । कोशीका लागि सकिब हकले नट आउट रहँदै २२ बलमा १ चौकासहित सर्वाधिक १६ रन जोडे ।
चिराग साह १० रनमा आउट हुँदा सोनु अन्सारी ४ रनमा नट आउट रहे । गण्डकीका लागि सुवास भण्डारीले १ विकेट लिए ।
त्यसअघि भैरहवाको एक्स्ट्रा टेक ओभलमा टस जितेर ब्याटिङ रोजेको गण्डकी २०.४ ओभरमा ३१ रनमा अल आउट भएको थियो ।
यो पिएम कपको इतिहासमा पहिलो इनिङमा बनेको सबैभन्दा कम योगफल हो । यसअघि सन् २०१९ को पिएम कपको दोस्रो सेमिफाइनलमा नेपाल एपिएफ क्लब नेपाल पुलिस क्लबविरुद्ध ४१ रनमा समेटिएको थियो ।
कोशीविरुद्ध गण्डकीका कुनै ब्याटरले पनि दोहोरो अंकमा रन जोड्न सकेनन् । गण्डकीका लागि युवा ओपनर अर्जुन कुमालले बनाएको ९ रन नै सर्वाधिक हो । गण्डकीका ४ ब्याटरले रनको खाता खोल्न नै सकेनन् ।
कोशीका लागि विपिन महतोले ८ ओभर बलिङ गर्दै १७ रन खर्चिएर ६ विकेट लिन सफल भए । फिर्दोस अन्सारीको नाममा ३ तथा दीपेश कंडेलको नाममा १ विकेट रह्यो ।
कोशीले पाँचौ खेलमा पहिलो जित हात पारेको छ । कोशीको २ अंक भएको छ । गण्डकीले खेलेको ४ मध्ये १ खेलमा जित हात पारेको छ । गण्डकीले कर्णाली प्रदेशलाई हराएको थियो ।
१० टोली सहभागिता रहेको प्रगियोगिता सिङ्गल राउण्डमा हुनेछ । लिग चरणको खेलमा शीर्ष २ मा रहने टोलीका बीचमा फाइनल हुनेछ ।