Prakash Adhikari March 30, 2025

 

काठमाडौं, १७ चैत्र । नेपाल क्रिकेट संघ (क्यान) गएको हप्ता नेपाली क्रिकेटका लागि दुई महत्वपूर्ण पदमा प्रशिक्षक चयन गरेको छ । संघले अष्ट्रेलियन प्रशिक्षक स्टुआर्ट ललाई दुई वर्षका लागि नेपाली राष्ट्रिय क्रिकेट टिमको मुख्य प्रशिक्षकको रूपमा नियुक्त गरेको छ भने भारतका मनिष झालाई महिला टिमको कन्सल्ट्यान्ट प्रशिक्षक ।

संघको शुक्रबार भैरहवामा बसेको केन्द्रीय कार्यसमिति बैठकले राष्ट्रिय टिमका प्रशिक्षकमा स्टुआर्ट ल लाई नियुक्त गर्ने निर्णय गरेको हो ।‌ यो संझौता मार्चको अन्त्यदेखि सम्झौता लागु हुनेछ । अनुबन्धको रकम भने सार्वजनिक नगरिने क्यानका प्रवक्ता छुम्बी लामाले बताए । ल एक देखि डेढ साता्मा नेपाल आइपुग्ने जनाइएको छ ।

ल अष्ट्रेलियाका पूर्व क्रिकेटर हुन् । खेल जीवनमा उत्कृष्ट ब्याट्सम्यानका रूपमा पहिचान उनले बनाएका थिए । सन् १९६८ अक्टोबर १८ मा ब्रिस्बेनमा जन्मेका लले घरेलु क्रिकेटमा क्विन्सल्याण्डबाट खेलेका थिए । उनले अष्ट्रेलियाको राष्ट्रिय टिमबाट सन् १९९५ मा एक टेस्ट खेल खेलेका थिए ।

स्टुआर्टसंग सन् १९९४ देखि १९९९ सम्म ५४ एकदिवसीय खेल खेलेको अनुभव पनि छ । उनले अष्ट्रेलियाली घरेलु क्रिकेटमा क्विन्सल्याण्डको सफलतामा ठूलो योगदान दिएका थिए । स्टुआर्टले इङ्ल्याण्डको काउन्टी क्रिकेट पनि खेलेका थिए ।

खेल जीवनपछि प्रशिक्षकको भूमिकामा प्रवेश गरेका उनले सन् २०११‌ देखि २०१२ सम्म टेष्ट राष्ट्र बङ्गलादेशको टिमको मुख्य प्रशिक्षकको जिम्मेवारी निर्वाह गरेका थिए । त्यसपछि उनले वेस्ट इन्डिज, अफगानिस्तान, श्रीलङ्का जस्ता क्रिकेटमा शीर्षमा रहेका राष्ट्रको लागि प्रशिक्षक तथा ब्याटिङ सल्लाहकारको भूमिकामा काम गरेका थिए । युवा खेलाडीलाई दक्ष बनाउने क्षमताका कारण उनी एक सफल प्रशिक्षकका रूपमा चिनिन्छन् ।

फाल्गुण १८ गते पूर्व प्रशिक्षक मोन्टी देसाईको सम्झौता नविकरण नगरेपछि मुख्य प्रशिक्षकको स्थान खाली रहेको थियो । क्यानले प्रशिक्षकको लागि खुल्ला गरेको आव्हानमा ७० प्रशिक्षकले आवेदन दिएको क्यानले जनाएको थियो । जसमध्ये सर्ट लिस्टमा १० जना रहेका थिए ।

आईसिसी विश्व कप लिग (२ मा नेपाल निकै कठिन अवस्थामा रहेको छ । स्टुआर्टलाई सुरूवातमा नै ठुलो चुनौती रहनेछ ।

महिला टिम कन्सल्ट्यान्टमा भारतका मनिष झा

नेपाल क्रिकेट संघ (क्यान) ले महिला विश्वकप क्रिकेट एशिया क्वालिफायरको लागि भारतीय मनिष झालाई कन्सल्टेन्ट प्रशिक्षक नियुक्त गरेको छ ।

भैरहवामा शुक्रबार बसेको केन्द्रीय कार्यसमितिको बैठकले यो निर्णय गरेको हो । झा पूर्व भारतीय क्रिकेटर तथा अनुभवी प्रशिक्षक हुन् । दायाँ हाते ब्याट्सम्यान तथा दायाँ हाते मिडियम पेस बलरका रूपमा उनले सर्भिसेस क्रिकेट टोलीबाट घरेलु क्रिकेट खेलेका थिए ।

क्रिकेट खेलाडीका रूपमा सक्रिय जीवनलाई बिट मारेसँगै झा प्रशिक्षकका रूपमा स्थापित भए । उनले सिक्किमको सिनियर टोलीको मुख्य प्रशिक्षकका रूपमा काम गरिसकेका छन् । सन् २०२१ को फेब्रुअरीमा उत्तराखण्ड सिनियर पुरुष टोलीको मुख्य प्रशिक्षकको जिम्मेवारी पनि निभाएका थिए । उनको नेतृत्वमा उत्तराखण्डले लगातार तीन वर्ष रणजी ट्रफीको क्वार्टरफाइनलसम्म यात्रा तय गरेको थियो ।

पुरुष क्रिकेटसँगै झाले महिला क्रिकेटमा पनि महत्वपूर्ण योगदान पुर्‍याएका छन् । उनी उत्तराखण्ड महिला क्रिकेट टोलीका प्रशिक्षक रहँदा टोलीलाई सन् २०२३–२४ सिजनको वुमन्स सिनियर वन डे ट्रफी र वुमन्स सिनियर टी २० ट्रफीको फाइनलसम्म पुर्याएका थिए ।

पछिल्लो दुई अन्तराष्ट्रिय सिरिजमा नेपालले अत्यन्त खराब प्रदर्शन गरेको थियो । लामो‌ समयदेखि महिला खेलाडीहरूले विदेशी प्रशिक्षकको माग गर्दै आएका थिए । झालाई यही क्वालिफायरको मात्र जिम्मेवारी दिइएको छ ।

Share Now