काठमाडौं, ३१ भाद्र । ऊर्जा, जलस्रोत तथा सिँचाइ मन्त्री विराजभक्त श्रेष्ठले दक्षिण कोरियाको भ्रमण रद्द गर्नुभएको छ ।
देशमा उत्पन्न प्राकृतिक विपत्ति र त्यसबाट ऊर्जा क्षेत्रमा परेको क्षतिका कारण उद्धार, पुनः स्थापना तथा विद्युत् आपूर्तिलाई नियमित बनाउने कार्यलाई प्राथमिकता दिँदै मन्त्री श्रेष्ठले पूर्वनिर्धारित भ्रमण रद्द गर्नुभएको जनाइएको छ।
भोटेकोशी–त्रिशूली नदी प्रणालीमा आएको बाढीबाट ऊर्जा क्षेत्रमा ठुलो क्षति पुगेको तथा अझै पनि ठुलो संख्यामा मानिस सम्पर्कविहीन रहेको अवस्थामा खोज तथा उद्धार कार्यमा प्रभावकारी समन्वय गर्नुपर्ने जिम्मेवारी मन्त्रालयसामु छ ।
साथै क्षतिग्रस्त ऊर्जा संरचनाको पुनः स्थापना, विद्युत् आपूर्ति नियमित तथा व्यवस्थित गर्ने, प्रभावित निजी ऊर्जा उद्यमीलाई आवश्यक सहजीकरण गर्ने र विपद्पछिको पुनर्निर्माण तथा पुनरुत्थानका कामलाई तीव्रता दिनुपर्ने भएकाले मन्त्री श्रेष्ठले विदेश भ्रमण स्थगित गर्ने निर्णय लिनुभएको हो ।
मन्त्री श्रेष्ठलाई दक्षिण कोरियाको राजधानी सियोलमा सेप्टेम्बर १५ देखि १७ तारिखसम्म आयोजना भएको ‘ग्लोबल इन्फ्रास्ट्रक्चर कोअपरेसन कन्फ्रेन्स २०२६’ मा मुख्य वक्ताका रूपमा सहभागी हुन आमन्त्रण गरिएको थियो ।
उक्त भ्रमणमा मन्त्री श्रेष्ठसँगै नेपाल विद्युत् प्राधिकरणका कार्यकारी निर्देशक दीर्घायु कुमार श्रेष्ठलगायतको टोली सहभागी हुने गरी मन्त्रिपरिषद्ले गत साउन १३ गते भ्रमण स्वीकृत गरेको थियो ।
नेपालमा २१६ मेगावाटको माथिल्लो त्रिशूली १ मा कोरियन लगानी रहेको छ । भोटेकोशी त्रिशूली बाढीले सबैभन्दा बढी क्षति सो आयोजनामा गरेको छ । सो आयोजनाको सुरुड.मा ३ सयभन्दा बढी मानिस थुनिएको बताइन्छ ।तर आज २२ दिन हुँदा पनि आयोजनाको सुरुड.मा गम्भीरतापूर्वक खोजी गरिएको छैन । सरकारको ध्यान पहिले सरकारी आयोजना त्रिशूली थ्री ए, त्रिशूली थ्री बी, चिलिमे, रसुवागढीमा केन्द्रीत भएको देखिन्छ । लामटाड. र माथिल्लो त्रिशूली १ खोजी र उद्धार त्यति प्राथमिकतामा परेको देखिएन ।
खोजी र उद्धारमा देखिएको उदासिनता र विभेदले सरकारलाई अन्तर्राष्ट्रिय मञ्चहरुमा टाउको देखाउन लाजलाग्ने स्थिति विकसित हुँदै गएको छ ।
