काठमाडौं, २ भाद्र । नेपालमा विगत २४ घण्टामा कोरोनाभाइरस सङ्क्रमणबाट थप ७ जनाको मृत्यु भएको र १ हजार १६ नयाँ सङ्क्रमित फेला परेका छन् ।
नेपालमा कोरोना भाइरसको संक्रमण सुरुभए देखिएको यो नै एकैदिन पुष्टि भएका कोरोना संक्रमितको सबैभन्दा धेरै संख्या हो ।
यो वृद्धिसँगै कोरोना संक्रमणबाट मृत्यु हुनेको सङ्ख्या १ संख्या१४ पुगेको छ भने सङ्क्रमितहरूको कुल सङ्ख्या २८ हजार २ सय ५७ पुगेको छ।
स्वास्थ्य तथा जनसंख्या मन्त्रालयका प्रवक्ता प्रा. डा. जागेश्वर गौतमले दिनुभएको जानकारी अनुसार अहिले देशभरि १० हजार ५ सय ६३ जना सक्रिय सङ्क्रमितहरु रहेका छन् ।
सङ्क्रमितहरूमध्ये २ हजार ८ सय ८७ जना घरमै र बाँकी ६ हजार ७ सय ५२ जना संस्थागत आइसोलेशनमा भएको मन्त्रालयले बताएको छ।
अहिले सबैभन्दा बढी सक्रिय सङ्क्रमित प्रदेश नं २ र वाग्मती प्रदेशमा छन्।
कोरोनाभाइरस
अहिले कोभिड १९ का कारण मृत्यु पुष्टि भएका व्यक्तिमध्ये छ जना पुरुष र एक जना महिला हुन्।
उनीहरू काभ्रे, नवलपरासी, मोरङ, धनुषा, बाँके र तनहुँको भएको मन्त्रालयले जनाएको छ।
शुक्रवार ५ सय ९४, शनिवार ४ सय ६८, आइतवार ६ सय ४१ र सोमवार ५ सय ८१ जनामा सङ्क्रमण पुष्टि भएको थियो।
यसअघि असार ४ गते ६ सय ७१, असार १० गते ६ सय २९, असार १९ गते ७ सय ४०, साउन २७ गते ६ सय ३८ र साउन ३२ गते ६ सय ४१ जनामा सङ्क्रमण पुष्टि भएको थियो।
मन्त्रालयले साउन ८ गते आठ जनाको मृत्यु भएको पुष्टि गरेको थियो।
अहिले देशभरि १० हजार ५ सय ६३ जनामा सक्रिय सङ्क्रमण छ। तीमध्ये केही घरमै अलग्ग बसिरहेका छन्।
सङ्क्रमित कहाँका ?
सङ्क्रमितहरू विभिन्न जिल्लाका हुन्।
तीमध्ये काठमाडौं उपत्यकाका २ सय ५ जना छन्।
त्यसैगरी पर्सामा १ सय २८, मोरङमा १ सय ८ र सर्लाहीमा १ सय ७, धनुषामा ६४, चितवनमा ४९, डोटीमा ४६ र बारामा ४२ सङ्क्रमित फेला परेका छन् ।
परीक्षणको अवस्था
विगत २४ घण्टामा १३ हजार ४ सय ६१ वटा नमुनाको पीसीआर विधिबाट परीक्षण गरिएको छ। यो अहिलेसम्मकै सर्वाधिक दैनिक परीक्षण भएको बताइएको छ।
सोही अवधिमा ८५ जना भाइरसमुक्त प्रमाणित भए।
मन्त्रालयका अनुसार अहिलेसम्म १७ हजार ५ सय ८० सङ्क्रमित निको भएका छन्। निको हुने सङ्क्रमितको सङ्ख्या ६२.२ प्रतिशत छ।
देशभरि क्वारेन्टाइनमा १३ हजार ९ सय २६ जना छन्। तीमध्ये सुदूरपश्चिम प्रदेशमा सर्वाधिक ३ हजार ६ सय ९६ जना, गण्डकीमा २ हजार ९ सय ७३ जना, प्रदेश नं १ मा २ हजार १ सय १५ जना र प्रदेश नं ५ मा २ हजार ९० जना छन्।
अहिले मोरङ, पर्सा, रौतहट, महोत्तरी र काठमाडौंमा सक्रिय सङ्क्रमितको सङ्ख्या ५ सय भन्दाबढी भएको मन्त्रालयको तथ्याङ्कले देखाउँछ।
तर मनाङ, मुस्ताङ, डोल्पा र हुम्लामा सक्रिय सङ्क्रमितको सङ्ख्या शून्यमा झरेको छ।
मन्त्रालयका अनुसार कर्णाली र सुदूरपश्चिम प्रदेशमा बाहेक अन्य प्रदेशमा कुल १ सय १८ बिरामी सघन उपचार कक्षमा छन्।
गम्भीर बिरामी भएर भेन्टिलेटरमा ८ जनालाई राखिएको छ।
(बीबीसीबाट)
