चामे(मनाड.), ९ आषाढ । मनाड.को सदरमुकाम चामेमा मर्स्याङ्दी नदी फेरि थुनिएको छ । चामे गाउँपालिका वडा नं ४ र ५ जोड्ने मर्स्याङ्दी नदी थुनिँदा चामे बजार जाने ठूलो पुल जोखिममा रहेको प्रमुख जिल्ला अधिकारी विष्णु लामिछानेले जानकारी दिनुभयो ।
पुलमुनि बाढीले बगाएर ल्याएका रूखका मुढा तथा पहिरोले ल्याएका ढुङ्गा अड्किँदा नदी थुनिएको प्रजिअ लामिछानेले जानकारी दिनुभएको छ ।
थुनिएको नदीमा पानीको बहाव बढेपछि पुलमाथिबाट पानी गइरहेको छ । नदी थुनिएपछि पुल नजिकै रहेको एक विद्यालय पनि जोखिम परेको छ ।
मङ्गलबार साँझदेखि परेको निरन्तरको वर्षापछि नदीमा पानीको बहाव बढेको हो ।
गत शनिबार पनि चामेको बजार क्षेत्र हुँदै झरेको घट्टेखोलाले ढुङ्गा माटो र काठदाउरा बगाएर ल्याएपछि नदी थुनिएको थियो ।
नदी थुनिएपछि सशस्त्र प्रहरी बल नं ३२ गुल्म र नेपाल प्रहरीको सहायतामा नदी खुलाइएको थियो । प्रजिअ लामिछानेका अनुसार नदीको बहाव बढ्दै गएको र यसले चामे बजार थप जोखिममा पारेको छ ।
सुरक्षाका सबै निकायसँग समन्वय गरी अहिले खुलाउने प्रयास भइरहेको उहाँले बताउनुभयो। लगातारको वर्षातले पानीको बहाव बढेकाले मनाड.को सदरमुकाम चामे उच्च जोखिममा रहेको प्रजिअ लामिछानेले बताउनुभयो ।
अहिले जिल्ला प्रशासन कार्यालय मनाड.ले चामे क्षेत्रका स्थानीयवासीलाई सतर्क रहन र सुरक्षित स्थानमा सर्न आग्रह गरिरहेको छ ।
