काठमाडौँ, १९ फागुन: वन तथा वातावरणमन्त्री डा वीरेन्द्रप्रसाद महतो संयुक्त राष्ट्रसङ्घीय पर्यावरण सभा (युएनइए–६) मा सहभागी भएर आज स्वदेश फर्किनुभएको छ । सभा केन्याको राजधानी नैरोबीमा फेबु्रअरी २६ देखि यही मार्च १ तारिखसम्म भएको थियो ।
उहाँलाई त्रिभुवन अन्तर्राष्ट्रिय विमानस्थलमा मन्त्रालयका सचिव डा दीपककुमार खराल, प्रवक्ता बद्रीराज ढुङ्गाना, राष्ट्रिय निकुञ्ज तथा वन्यजन्तु संरक्षण विभागका महानिर्देशक डा सिन्धुप्रसाद ढुङ्गाना, राष्ट्रिय प्रकृति संरक्षण कोषका सदस्यसचिव शरदचन्द्र अधिकारीलगायतले स्वागत गर्नुभयो ।
विमानस्थलमा मन्त्री महतोले उक्त सभा र आफ्नो भ्रमण फलदायी भएको बताउँदै सभा बहुपक्षीयताले मानव समुदायले भोगिरहेको जलवायु परिवर्तन, प्रदूषण र जैविक विविधताको हानीको सङ्कट सामना गर्न कसरी मद्दत गर्न सक्छ भन्नेमा केन्द्रित रहेको जानकारी गराउनुभयो ।
साथै उहाँले सभा विश्वभरिका सरकारका प्रतिनिधि, नागरिक समाज, वैज्ञानिक, निजी क्षेत्रलगायतको प्रयत्नमा वैश्विक वातावरण नीति तय गर्न महत्त्वपूर्ण अवसर बनेको सुनाउनुभयो । सप्ताहव्यापी चलेको सभामा एक सय ९० देशबाट झण्डै छ हजारले भाग लिएका थिए । युएनइएले मानवता र प्रकृतिबीच सद्भाव पुनःस्थापना गर्न मद्दत गर्ने लक्ष्य राखेको छ । मन्त्री महतोले सो सभामा नेपाल सरकार र विभिन्न निकायबाट संरक्षणको क्षेत्रमा नेपालले हासिल गरेका उपलब्धिबारे विश्वस्तरीय पहिचान भएकामा खुसी व्यक्त गर्नुभएको थियो ।
सभाको उद्घाटनसत्रमा मन्त्री महतोले नेपाललाई संरक्षणको क्षेत्रमा लामो समयदेखि सहयोग गर्ने संयुक्त राष्ट्रसङ्घका निकाय, विश्ववन्यजन्तु कोषलगायत दातृ संस्थाप्रति आभार व्यक्त गर्नुभयो । उहाँले आफूहरू सबैले मिलेर काम गर्दा संयुक्त राष्ट्रसङ्घको ‘पारिस्थितिक प्रणाली पुनःस्थापनाका दशक’ कार्यक्रममा सफलता मिलेको उल्लेख गर्दै त्यस्तो सफलतासँगै देखिएका मानव–वन्यजन्तु द्वन्द्वका चुनौतीका बारेमा ध्यानाकर्षणसमेत गराउनुभएको जानकारी दिनुभयो ।
मन्त्री महतोले बासस्थानको पुनःस्थापनाको परिणामस्वरूप नेपालले पछिल्ला दशकमा बाघ र गैँडाको सङ्ख्यामा उल्लेख्य वृद्धि गर्न सफल भएकोबारे उक्त विश्वमञ्चमा जानकारी गराउनुभएको थियो ।
