काठमाडौँ, ४ भदौः नेपाली कांग्रेसका नेता डा शेखर कोइरालाले स्वास्थ्य सेवा जनताको पहुँचबाट टाढा हुन नहुने बताउनुभएको छ ।
सुनकोशी ईन्द्रवाती सेवा समाज सिन्धुपाल्चोकले त्रिभुवन शिक्षण अस्पताल महाराजगञ्जमा आयोजना गरेको सम्मान कार्यक्रममा उहाँले स्वास्थ्य सेवा जनताको पहुँचबाट टाढा हुन नहुनेमा जोड दिनुभयो ।
नेता डा कोइरालाले स्वास्थ्य शिक्षा सर्वसाधारणको पहुँचबाट टाढा रहेको र सरकारी शैक्षिक संस्थामा पैसा नभए पढ्नै नसक्ने अवस्था आएको बताउनुभयो । “मेडिकल शिक्षा अत्यन्त महङ्गो र हुनेखानेले मात्र पढ्ने खालको बनेको छ, स्वास्थ्य शिक्षा र स्वास्थ्य सेवाको वातावरण सहज बनाउनुपर्छ”, डा कोइरालाले भन्नुभयो ।
उहाँले सरकारी अस्पतालमा समेत जनताले सेवा लिन नसक्ने अवस्थामा आएको बताउनुभयो । “त्रिभुवन शिक्षण अस्पताल, वीर अस्पतालमा समेत जनताले पैसा तिरेर उपचार गर्न सक्ने अवस्था छैन, अन्य निजी अस्पतालबाट झन् जनताले कसरी सेवा लिनु”, उहाँले प्रश्न गर्नुभयो ।
स्वास्थ्य प्रणालीलाई सरल र सहज कसरी बनाउन सकिन्छ त्यतातिर सरकारले ध्यान दिनुपर्ने उहाँको भनाई थियो ।
समाजद्वारा सम्मान प्रदान
सुनकोशी इन्द्रावती समाज सिन्धुपाल्चोकले चिकित्सक, स्वास्थ्यकर्मी तथा विभिन्न संस्थाहरूलाई आज सम्मान गरेको छ ।
समाजबाट प्रा डा सगुननारायण जोशी, प्राडा केपी सिंह, प्राडा जीवनकुमार श्रेष्ठ, प्राडा दीपकप्रकाश महरा, प्राडा आनन्दकुमार शर्मा, प्राडा शङ्करमान राई, प्राडा पद्मराज पन्त, प्राडा रत्नमणि गजुरेललगायत चालीसभन्दा बढी चिकित्सक, परिचारिका एवं विभिन्न संस्थाहरू सम्मानित भएका हुन् ।
नेपाली कांग्रेसका वरिष्ठ नेता डा शेखर कोइराला र समाजका अध्यक्ष भूपेन्द्र थापाले उहाँहरूलाई सम्मानपत्र प्रदान गर्नुभयो ।
सो अवसरमा नेता डा कोइरालाले नेपालमा स्वास्थ्य र शिक्षा निकै महँगो भएकाले यसलाई कसरी पहुँचयोग्य बनाउने भन्ने विषयमा सरकारले काम गर्नुपर्ने बताउनुभयो । उहाँले भन्नुभयो, “स्वास्थ्य प्रणालीलाई कसरी अलि कम खर्चिलो र व्यवस्थित गर्न सकिन्छ भन्ने विषयमा सोच्नुपर्छ ।”
समाजका अध्यक्ष थापाले दाताको सहयोगमा शिक्षा र स्वास्थ्यमा क्षेत्रमा संस्थाले सेवा गरिरहेको जानकारी दिनुभयो । “सम्मानित हुने सबै व्यक्तित्व सिन्धुपाल्चोकको दुर्गम ठाउँमा गएर रोगीको उपचार गर्नुभएको छ । स्वास्थ्यको पहुँच नभएकालाई अतुलनीय योगदान पुर्याउनुभएको छ”, उहाँले भन्नुभयो । –––
—
