वाशिंटन डी.सी.(संयुक्त राज्य अमेरिका),१४ चैत्र । कोरोना भाइरसको संक्रमण अमेरिकामा अप्रत्यासित रुपमा बढ्दै गएको छ । बिहिबारको अन्त्यसम्म कोरोनाबाट संक्रमित बिरामीको संख्या सबैभन्दा बढी हुने देशको सूचीको शीर्षमा विश्वको शक्ति राष्ट अमेरिका पुगेको छ ।

अमेरिकी समाचार संस्था सीएनएनले जनाए अनुसार बिहिबार अमेरिकामा कोरोना संक्रमित बिरामीहरुको संख्या ८२ हजार १ सय पुगेको छ । जबकी चीनमा यस्ता संक्रमित बिरामीको संख्या ८१ हजार ७ सय ८२ भएको जनाइएको छ । विश्वभर ५ लाख १० हजार जनाभन्दा बढीमा कोरोनाको संक्रमण देखिएको छ ।

बिहिबार अमेरिकामा कोरोना संक्रमणबाट २ सय ४६ जनाको मृत्यु भयो । न्यूयोर्कको क्वीन्सको इल्महस्र्ट अस्पतालमा गएको २४ घण्टामा १३ जना बिरामीको मृत्यु भएको छ । योसंगै अमेरिकामा मर्नेहरुको संख्या १ हजार १ सय ९५ पुगेको छ ।

अमेरिकामा हालसम्म न्यूयोर्क, वाशिंटन र क्यालिफोर्नियामा यसको संक्रमण बढी देखिएको छ । तर जनस्वास्थ्यका विश्लेषकहरुले आउदा दिनमा मिचिगन र इलिनोइस  इपिसेन्टरको रुपमा विकसित हुनसक्ने चेतावनी दिएका छन् ।ह्वाइट हाउसका कोरोना प्रत्तिउत्तर संयोजकले वाइने काउन्टी,मिचिगन,कुक काउन्टी र इलिनोइसमा बढी घट्नाहरु तीव्र रुपमा देखिएको जनाउनुभएको छ । यो हप्तामा लुजियानामा पनि संक्रमणका घट्नाहरु बढिरहेका छन् ।

न्यूयोर्कमा संक्रमणका घट्ना अमेरिकाको कूल घट्नाको आधाजसो छ । न्यूयोर्कमा संक्रमणका ३७ हजारभन्दाबढी घट्ना सार्वजनिक भएका छन् । त्यहाँ भेन्टिलेरको पनि अभाव भएको छ । एउटै भेन्टिलेटर दुईजनालाई साझेदारी गर्ने ब्यवस्था मिलाइएको छ ।

सानफ्रान्सिक्कोमा पनि भेन्टिलेरको अभाव देखिदैछ । अमेरिकाका ५० मध्ये २१ राज्यले कोरोनाको कारण राज्यमा संकटकाल घोषणा गरेका छन् ।

इटलीमा दुई दिनको तुलनामा फेरि मर्नेहरूको सङ्ख्या बढेको छ। त्यहाँ पछिल्लो एक दिनमा ७१२ जनाको ज्यान गएको छ।

फ्रान्समा एक दिनमा ३६५ जनाको ज्यान गएको छ भने युकेमा पनि एकै दिनमा पहिलो पटक एक सयभन्दा धेरैको ज्यान गएको छ।

संसारका १८० भन्दा बढि देशमा यो रोग फैलिसकेको छ।

करिब २३ हजार मानिसको ज्यान गइसकेको छ।