गोरखा,१७ पुस । नेपाली कांग्रेसका वरिष्ठ नेता रामचन्द्र पौडेलले संविधानमा उल्लेखित बहुलवादमा आधारित संसदीय प्रणालीलाई कसैले तलमाथि गर्न नपाउने बताउनुभएको छ ।
नेपाल प्रेस युनियन गोरखाको जिल्ला अधिवेशनलाई मंगलबार उद्घाटन गर्दै उहाँले भन्नुभयो, ‘संविधानमा बहुलबादमा आधारित संसदीय व्यवस्था मान्ने कुरा उल्लेख छ, त्यसमा कसैले तलमाथि गर्न पाउँदैन ।’
उहाँले पार्टीलाई आन्तरिक रुपमा एकताबद्ध बनाउने कुरा पार्टी सभापतिमा भर पर्ने बताउनुभयो । उहाँले आफू एकताको लागि प्रतिबद्ध रहेको समेत बताउनुभयो ।
‘म एकताका लागि पूर्ण रुपमा प्रतिबद्ध छु, अब एकतालाई साकार रुप दिने कुरा पार्टी सभापतिमा भरपर्छ’, उहाँले भन्नुभो, ‘पार्टी एकताको डाडुपन्यु पार्टी सभापतिको हातमा छ ।’
सभापति शेरबहादुर देउवाले गर्ने व्यवहारले नै पार्टीलाई एकताबद्ध गर्न मद्दत पुग्ने बताउँदै उहाँले अहिलेसम्म पार्टीलाई एक बनाएर लैजान आफूले निरन्तर पहल गर्दै आइरहेको छु भन्नुभयो।
वरिष्ठ नेता पौडेलले सभापतिको पक्षपात पूर्ण व्यवहारका कारण नै पार्टी कमजोर बन्दै गरेको आरोप लगाउँदै ‘पार्टीलाई एकताबद्ध बनाउन सहयोगका लागि म जहिले पनि तयार छु, अरु बाँकी काम पार्टी सभापतिको हो’, भन्नुभयो ।
वरिष्ठ नेता पौडेलले लोकतन्त्रमा विकास हुन सक्दैन भन्नु नेकपाभित्र रहेको अलोकतान्त्रिक कुरा हो भन्दै विश्वमा भएका सबै विकास लोकतन्त्रका कारण मात्र सम्भव भएको बताउनुभयो ।
सरकारको नेतृत्व गरेको दलले सबै अधिकार प्रधानमन्त्रीमा लगेर थुर्पाने कोसिस गरिरहेको आरोप लगाउँदै उहाँले भन्नुभयो, ‘जुन प्रणालीले देशलाई अहिलेको स्थितिमा ल्याएको छ, त्यसमा सबै इमान्दार भएर लाग्नुपर्छ ।’
