म्यानमार,२० चैत्र । एएफसी महिला ओलम्पिक छनौटको दोस्रो चरणमा आज नेपाली महिला फुटबल टोली र म्यानमारको महिला राष्टिय टीमबीच प्रतिस्पर्धा हुँदैछ ।
नेपाली समयअनुसार ५ :१५ बजे मण्डलेस्थित मण्डलरथिरी स्टेडियममा हुने आजको खेलमा नेपाल म्यानमारलाई पराजित गर्ने रणनीतिमा उत्रिनेछ । स्मरणीय छ, अन्तर्राष्ट्रिय फुटबलमा नेपाली महिला फुटबल टोलीले म्यानमारलाई अहिलेसम्म हराउन सकेको छैन ।
प्रतियोगिताको पूर्वसन्ध्यामा मंगलबार साँझ आयोजित पत्रकार सम्मेलनमा बोल्दै नेपाली टोलीका प्रशिक्षक हरि खड्काले आज म्यानमार विरुद्ध काउण्टर अट्याक खेल्ने बताउनुभएको छ ।
तर पनि म्यानमारविरुद्ध उसकै घरेलु मैदानमा खेल्न नेपाली चेलीहरुलाई त्यति सहज भने छैन् ।
छनौट प्रतियोगितातर्फ समूह ए मा रहेको नेपाल र म्यानमारसँगै अर्को दुई टोली भारत र इण्डोनेसियाबीच पनि आज सोही मैदानमा खेल हुनेछ ।
