काठमाडौं, १ माघ । २०७५ बैशाख १४ गतेलाई प्रदर्शन मिति लक गरिएको युवा स्टार प्रदीप खड्का र प्रियंका कार्की अभिनित बहुप्रतिक्षीत फिल्म ‘लिलिबिली’को पहिलो गीत सार्वजनिक भएको छ ।
सोमवार राजधानीमा एक कार्यक्रमका बीच निर्माण यूनिटले फिल्ममा समावेश ‘इज इट लभ रु’ बोलको रोमान्टिक गीत सार्वजनिक गरेको हो ।
माघे सङ्क्रान्तिको अवसर पारेर सार्वजनिक गरिएको गीतको भिडियोमा नायक प्रदीप र नव-नायिका जसिता गुरुङ प्रस्तुत छन् । गीतमा स्कटल्याण्डको सौन्दर्य कैद गरिएको छ । यी दृश्यहरु सुदिप बरालले खिचेका हुन् ।
कविराज गहतराजको कोरियोग्राफी रहेको गीतको भिडियोमा प्रदीप र जसिताको केमेष्ट्री गजब मिलेको छ ।
गीत प्रताप दास र मेलिना राईको कर्णप्रिय आवाजले गुञ्जिएको छ। राजेश कुमार श्रेष्ठले लेखेको गीतलाई एलिस कार्कीले संगीत भरेका हुन् ।
फिल्ममा प्रदीप र जसिताका अलावा प्रियंका कार्की, अनुप विक्रम शाही लगायतका कलाकारहरु पनि अभिनय छ । स्कटल्याण्डसँगै नेपाल, लन्डन र टर्कीको स्तानबुलमा फिल्मको छायांकन गरिएको हो ।
भिडियो
काफिया फिल्मस्, सुदीप खड्का प्रोडक्सन र चाम्स इन्टरटेनमेन्टको व्यानरमा निर्माण भएको यो फिल्ममा गोविन्द शाही, सुदिप खड्का र निर्देशक चाम्सको लगानी छ ।
सोमवार ‘लिलिबिली’को गीत रिलिज कार्यक्रममा नायिका प्रियंकामाथि ‘कम उमेरको नायकसँग काम गर्दा कस्तो अनुभव रह्यो भन्न प्रश्न गर्दा उनले उल्टै पत्रकारलाई नै प्रश्न गरिन्, ‘जब एउटा अभिनेताले कुनै २० वर्ष कम उमेरको नायिकासँग काम गर्छ तब यो प्रश्न किन उठ्दैन र?’
उनले भनिन्,आफूभन्दा कम उमेरको नायकसँग काम गर्दा पहाड नै खोलाले बगाएर लान्छ जस्तो मलाई लाग्दैन । हामीले आफ्नो भूमिका न्यायपूर्वक निर्वाह गर्ने हो ।’
प्रियंकाको छेवैमा बसेका नायक प्रदीपले प्रियंकासँगै काम गर्दा समवयी महशुस गरेको बताए ।
